Rus kəşfiyyatı Avropa Birliyinin 1 noyabrda Serbiyada “rəngli inqilab” ssenarisi hazırladığını iddia edib.
Rusiya Xarici Kəşfiyyat Xidməti (SVR) bildirib ki, Avropa Birliyi (AB) Serbiyanın Novi Sad dəmiryolu vağzalında baş vermiş qatar qəzasının ildönümündə, Ukraynada 2014-cü ildə yaşanan “Euromaydan”a bənzər “rəngli inqilab” təşkil etməyə hazırlaşır.
SVR-in məlumatına görə, Serbiyadakı son etirazların böyük ölçüdə Avropa ölkələrinin fəaliyyətlərinin nəticəsi olduğu, gənclərin radikallaşdırılaraq “inqilabi metodlara” yönəldildiyi vurğulanıb.
Digər tərəfdən Rusiya kəşfiyyatı “güclü milli hisslər, Serb Pravoslav Kilsəsinin birləşdirici təsiri və NATO-nun 1999-cu ildəki bombardmanının ictimai yaddaşda hələ də canlı olması” səbəbilə indiyə qədər Serbiyaya qarşı cəhdlərin “uğurlu olmadığını” bildirib.
Açıqlamada həmçinin Brüsselin “müstəqil media” görüntüsü altında bəzi serb xəbər portallarına və qeyri-hökumət təşkilatlarına maliyyə dəstəyi verdiyi irəli sürülüb.
