İsrail müxalifətinin arqumenti haqlıdır
İsrailin Baş naziri Benyamin Netanyahu gecə saatlarında müdafiə naziri Yoav Qallantı vəzifəsindən azad edib, yerinə xarici işlər naziri İsrail Katzı təyin edib. Katz deyib ki, əsas vəzifəsi Qəzzadakı israilli girovların qaytarılmasından ibarətdir: "Məni müdafiə naziri təyin etməklə göstərdiyi etimada görə Baş nazir Netanyahuya təşəkkür edirəm. Düşmənlərimiz üzərində qələbəni gücləndirmək və müharibənin məqsədlərinə nail olmaq üçün birlikdə çalışacağıq. Qəzzada HƏMAS-ın məhv edilməsi, Livanda Hizbullahın məğlubiyyəti, İranın təcavüzkar fəaliyyətinin qarşısını almaq, şimal və cənub sakinlərinin evlərinə qayıdışını təmin etmək əsas vəzifəmizdir”. Netanyahunun müdafiə naziri Yoav Qallantı vəzifədən azad etməsindən sonra aksiyalar başlayıb. Etirazçılar Netanyahunun iqamətgahı qarşısında da toplaşıblar və polislə toqquşma yaşanıb. Müxalifət də müharibə gedən ölkədə müdafiə nazirinin işdən çıxarılmasına etiraz edib. Məlumata görə, Netanyahu Baş Qərargah rəisi Herzi Halevi və Baş Təhlükəsizlik Xidmətinin rəhbəri Ronen Barı da vəzifədən azad etmək niyyətindədir.
Politoloq Turan Rzayev "Sherg.az"a deyib ki, İsrail müxalifətinin arqumenti haqlıdır. Müharibə zamanı müdafiə nazirinin dəyişdirilməsi radikal qərardır. Lakin bu qərar iki mühüm hadisə fonunda verildi. Həmin hadisələr ABŞ-də prezident seçkilərinin keçirilməsi və İsrailin İrana gözlənilənin əksinə məhdud xarakterli cavab verməsidir:
"İran-İsrail gərginliyi fonunda Təl-Əvivin İranın nüvə obyektlərini hədəfə alması və məhv etməsi gözlənilirdi. Hətta bu gediş fonunda regionda İsrail-İran müharibəsinin başlayacağı ehtimalları vardı, lakin bu baş vermədi. Aydındır ki, ABŞ bu məsələdə İsrailə veto qoydu. Hətta İrana İsrailin hücumuna cavab verməməsi ilə bağlı xəbərdarlıq edildi. Xəbərdarlıqda bu dəfə “İsrailin qarşısını ala bilməyəcəyik” deyilməsi də vəziyyətin ciddiliyindən xəbər verir. ABŞ-nin İsraili xəbərdar etdiyi təəssüratı yaransa da, Netanyahunun gecə saatlarında müdafiə naziri Yoav Qallantı vəzifəsindən azad etməsi fərqli mətləblərdən xəbər verir. Görünür, Netanyahu Vaşinqtonun xəbərdarlığını dinləməyib və İranın nüvə obyektlərinə zərbə vurmaq əmrini verib. Amma Yoav Qallant, Herzi Halevi və Baş Təhlükəsizlik Xidmətinin rəhbəri Ronen Bar bu əmrə əməl etməyib".
Siyasi şərhçiyə görə, Netanyahu ehtimal ki, buna görə Qallantı vəzifəsindən uzaqlaşdırıb:
"İkinci məsələ isə bu qərarın ABŞ-də prezident seçkilərinin getdiyi zamanda verilməsidir. Netanyahu adi vaxtda belə qərar versə, Vaşinqton qarşı çıxa bilərdi. Buna görə də məhz indi bu qərarı verdi. Aydın məsələdir ki, seçki prosesi və sonrası Vaşinqtonun başı qarışıq olacaq. İsrail isə yeni prezidentin seçilməsi fonunda atacağı addımlara hazırlıq görür. ABŞ prezident seçkilərindən sonra İsrail-İran gərginliyi yenidən arta bilər. Bu dəfə daha sərt formada..".
