Türkiyənin Isparta şəhərində özəl xəstəxanada diş müalicəsi alan 7 yaşlı Ela Kocaçöğürün ümumi anesteziya altında aparılan prosedur zamanı ürəyinin dayanması nəticəsində həyatını itirdiyi iddia olunur.
Sherg.az xəbər verir ki, ailənin şikayətindən sonra hadisə ilə bağlı araşdırmaya başlanılıb. Mərhumun meyiti ekspertiza üçün morqa göndərilib.
Isparta Diş Həkimləri Palatasının sədri Naim Şenyurt bildirib ki, hadisənin dəqiq səbəbi yalnız məhkəmə-tibbi ekspertizasının nəticələrindən sonra məlum olacaq.
Onun sözlərinə görə, uşaqlarda bəzi hallarda diş müalicəsinin aparılması üçün ümumi anesteziya və ya sedasiya tətbiq edilir. Şenyurt qeyd edib ki, hadisə ilə bağlı həm hüquq-mühafizə orqanları, həm də aidiyyəti qurumlar tərəfindən araşdırma aparılır.
Palata rəhbəri əlavə edib ki, hər hansı səhlənkarlıq və ya nöqsan aşkarlanarsa, qanunvericiliyə uyğun tədbirlər görüləcək.
