İsrailin İrana hava hücumunu qətiyyətlə pisləyirik.
Teleqraf xəbər verir ki, bu barədə Türkiyə Xarici İşlər Nazirliyi İsrailin İrana qarşı həyata keçirdiyi hava hücumu ilə bağlı yazılı açıqlama yayıb.
Nazirlik bildirib ki, bu hücum beynəlxalq hüququn açıq şəkildə pozulmasıdır və İsrailin bölgədəki sabitliyi pozmağa yönəlmiş strateji siyasətinin bir hissəsi olan təxribat xarakteri daşıyır.
Qeyd olunub ki, hücumun İranın nüvə proqramı ilə bağlı diplomatik danışıqların intensivləşdiyi bir dövrdə həyata keçirilməsi, İsrail hökumətinin diplomatik həll yollarına maraqlı olmadığını və öz maraqları naminə regional sabitliyi və qlobal təhlükəsizliyi riskə atmaqdan çəkinmədiyini göstərir.
Nazirlik İsrailin daha genişmiqyaslı qarşıdurmalara səbəb ola biləcək təcavüzkar addımlarını dərhal dayandırmasının vacibliyini vurğulayıb.
Açıqlamanın sonunda isə belə qeyd edilib:
"Yaxın Şərqdə daha çox qan və dağıntı görmək istəmirik. Münaqişənin yayılmaması üçün beynəlxalq ictimaiyyəti təcili şəkildə hərəkətə keçməyə çağırırıq".
Xatırladaq ki, İsrail Hərbi Hava Qüvvələri iyunun 13-də səhər saatlarında İrana zərbələr endirib. Hücum zamanı ölkənin Fordo və Natantz nüvə obyektləri, eləcə də hərbi bazaları hədəfə alınıb. İranın Atom Enerjisi Təşkilatı Natanz nüvə obyektinin məhv edildiyini təsdiqləyib.
Hava əməliyyatları nəticəsində İran İslam İnqilabı Keşikçiləri Korpusunun baş komandanı general-mayor Hüseyn Salami, Silahlı Qüvvələrin Baş Qərargah rəisi general-leytenant Məhəmməd Hüseyn Baqiri, Ali Rəhbər Seyid Əli Xameneinin müşaviri Əli Şamxani, “Hatəm-əl-Ənbiya” Qərargahının rəisi Qulam Əli Rəşid və digər yüksək rütbəli şəxslər, o cümlədən üç nüvə alimi həlak olub.
İran isə bir neçə saat sonra cavab zərbələrinə başlayıb. Tehran İsrail istiqamətində 100-dən çox pilotsuz təyyarə göndərib.
