İyulun 10-da Nizami Kino Mərkəzində Baku TV-nin istehsalı olan "Söz" adlı qısametrajlı sənədli filmin təqdimat mərasimi keçirilib.
Sherg.az xəbər verir ki, Ssenarisi real hadisələrə əsaslanan bu sənədli film 44 günlük Vətən müharibəsinə həsr olunub. "Söz" filmi müharibə iştirakçısı, Baku TV-nin əməkdaşı Ələkbər Nəsirovun həyat hekayəsini əks etdirir.
Filmdə Ələkbərin müharibə zamanı keçirdiyi emosiyalar dolğun şəkildə təsvir olunur. Onun timsalında müharibənin insan psixologiyasına vurduğu zərbələr və yaratdığı dəhşətlər tamaşaçıya çatdırılır.
"Söz" eyni zamanda Ələkbərin müharibəyə özü ilə birgə apardığı Seymurun xatirəsini və silahdaşı Raufun atasına verdiyi, lakin yerinə yetirə bilmədiyi vədi də ön plana çıxarır.
Müharibənin doğurduğu ağrılarla yanaşı, ekran əsəri bir qəhrəmanın sarsılmaz vətənpərvərliyindən də bəhs edir. Ələkbərin “Əsas mən yox, əsas bu fotoda Şuşa var” deməsi onun üçün şəxsi varlıqdan daha çox Vətənin önəmli olduğunu aydın şəkildə nümayiş etdirir.
Qeyd edək ki, film Qarabağ həqiqətlərinin dünya ictimaiyyətinə çatdırılması məqsədilə rus və ingilis dillərində də təqdim olunur.
Xatırladaq ki, "Söz" sənədli filmi Los-Ancelesdə keçirilən və hər il minlərlə filmin təqdim olunduğu “Accolade Global Film Competition”da mükafata layiq görülüb. Həmçinin, film "Roma Prisma Film Awards" beynəlxalq film müsabiqəsinin finalçısı olub.
