Hazırda cəbhə xəttində Azərbaycan Silahlı Qüvvələrinin torpaqlarımızın işğaldan azad olunması istiqamətində əks-hücum əməliyyatı davam edir. İstər hərbi texnika, istərsə də döyüş intizami ilə geridə qalan düşmən tərəfi sərhəd rayonlarda yaşayan mülki əhalini hədəf alır. Görünür həm siyasi arenada, həm də savaş meydanında məğlubiyyətə düçar olan pirat dövlət bunun acısını əli yalın insanlardan çıxmağa çalışır. Qeyd edək ki, işğalçı ermənilər bu günlərdə Gəncə, Mingəçevir şəhərlərinə, Xızı-Abşeron ərazisinə raket zərbələri endirməyə çalışıblar. Bundan əlavə sərhəd rayonlarımızdan bir neçəsini – “PUA”lar vasitəsilə vurmağa cəhd ediblər. Lakin düşmənin “PUA”-ları məhv edilərək bu cəhdin qarşısı alınıb. Şübhəsiz ki, bütün bunlar qarşı tərəfin işğalçı, terrorist və naqis əməllərinin növbəti sübutdur.
Bizim haqq savaşımız isə təkcə cəbhədə deyil, virtual məkanda da gedir. İstər sosial şəbəkələrin azərbaycanlı istifadəçiləri, istərsə də media agentlikləri düşmənlə gecə-gündüz demədən mübarizə aparır.
“Sherg.az” da zəfərə addımladığımız günlərdə xalqın sevimlisi olan ziyalıların, mədəniyyət-incəsənət xadimlərinin fikirlərini öyrənərək oxuculara çatdırır.
Növbəti dəfə bizimlə həmsöhbət olan xalq şairi Nəriman Həsənzadə sevincini dilə gətirib. Ordumuzun məğlubedilməz olduğunu söyləyən şair hazırda Azərbaycanın qələbə çaldığını da əlavə edib:
“İndi millət oyanıb, xalq əvvəlki xalq deyil. Siz də əvvəlki deyilsiz, mən də. Hamımız Vətən eşqi ilə yaşayırıq. Azərbaycan xalqı ayağa qalxıb. Bu tarixin dönüş mərhələsidir. Ordumuz qələbə çalır. Öz torpaqlarımızı işğalçılardan azad edirik.
Onlar isə dinc əhalini atəşə tuturlar. Bunlar beynəlxalq konvensiyalara ziddir. Son nəfəslərini verirlər. Ona görə bu müharibədə biz qələbə çalacağıq.
Çünki öz torpaqlarımızda vuruşuruq. Qarşı tərəf isə özgə torpağındadır. Bizim torpaqlarımızdan çıxmalıdırlar. Televiziyada görürük ki, hərbi texnikalarını, postlarını qoyub, qaçırlar.”
Ermənistanın baş naziri Nikol Paşinyanın həqiqətdən uzaq, tutarsız çıxışlarından söz açan xalq şairi onun böhtançı olduğunu xüsusi vurğulayıb:
“Deyir ki, Dağlıq Qarabağın Azərbaycan tərəfindən alınması genosidə səbəb ola bilər. O başa düşmür ki, Azərbaycan xalqı soyqırım törətməz. Özləri isə Xocalı kimi soyqırımı törədən cəladdırlar. Biz cəlladlarla vuruşaraq torpaqlarımızı azad edirik. Məsələn tarixə nəzər salsaq görərik ki, Rusiya öz torpaqlarını Hitlerdən azad etdi. Deməli, Nikol Paşinyan rusları da terrorçu adlandırır?
Müharibə dövründə Sankt-Petrerburqu bombaladılar, amma əhalisi heç yerə çıxmadı. Xalq qalib gəldi. Azərbaycan xalqı da qəhrəmandır. Millətimiz 30 il səbr etdi, dözdü. İndi də cənab Prezidentin başçılığı ilə əzəli torpaqlarının azadlığı uğrunda savaşır.
Hamımız Ali Baş Komandan İlham Əiyevin yanındayıq. Ordumuz da güclüdür. Ona görə tezliklə bütün torpaqlarımızı işğaldan azad edəcəyik”.
