Azərbaycan Dillər Universitetinin Mətbuat Şurasında təcrübə keçən bir qrup tələbə "Şərq" qəzetinin redaksiyasında qonaq olub. Səfər çərçivəsində tələbələr qəzetin fəaliyyəti, tarixi və ümumilikdə Azərbaycan mətbuatı haqqında ətraflı məlumat alıblar.
Qəzetin baş redaktoru, tanınmış tədqiqatçı jurnalist Akif Aşırlı tələbələrə Azərbaycan mətbuat tarixinin inkişaf mərhələlərindən, görkəmli mətbuat xadimlərinin fəaliyyətindən və ölkədə medianın bugünkü durumu barədə geniş məlumat verib.
O, həmçinin jurnalistikanın cəmiyyətə təsiri və medianın ictimai rolu haqqında tələbələrlə fikir mübadiləsi aparıb.
Görüş zamanı müxtəlif maraqlı mövzular ətrafında söhbətlər edilib, tələbələrin sualları cavablandırılıb. Daha sonra qonaqlar "Şərq" qəzetinin redaksiyasında fəaliyyət göstərən və ölkəmizdə yeganə olan Mətbuat Muzeyi ilə tanış olublar. Akif Aşırlı muzeyin ekspozisiyası haqqında ətraflı məlumat verərək, burada sərgilənən və Azərbaycan mətbuatının müxtəlif dövrlərinə aid nadir eksponatlar, qəzet və jurnallar, arxiv sənədləri, çap avadanlıqları barədə danışıb.
Tələbələr muzeydə nümayiş olunan eksponatlar vasitəsilə milli mətbuatımızın keçdiyi tarixi yolu daha yaxından izləmək imkanı əldə ediblər.
Görüşdə qəzetin baş redaktorunun birinci müavini Yusif Nəzərli də iştirak edib. O, müasir media mühiti, müasir jurnalistika ilə bağlı tələbələrlə fikir mübadiləsi aparıb, tövsiyələr verib. Sonda tələbələrlə xatirə fotosu çəkilib.
