Sakaryada, Qara dənizə sahili olan üç rayonda rip axını təhlükəsi davam edir. Karasu, Kaynarca və Kocaali rayonlarında bu gün də dənizə girmək qadağandır.
Sherg.az xəbər verir ki, ölümcül nəticələrə səbəb ola bilən rip axını təhlükəsinə görə, rayon icra hakimiyyətlərinin qərarı ilə Sakarya sahillərində bu gün də qırmızı bayraq qaldırılıb.
Sakarya Böyükşəhər Bələdiyyəsi Yanğınsöndürmə İdarəsinin Xilasedici Qrup Müdirliyi əməkdaşları, vətəndaşlara dənizə girməmələri barədə xəbərdarlıq edərək sahillərdə nəzarəti davam etdirirlər.
Rip axını nədir?
Rip axını iki əsas amilin birgə təsiri nəticəsində yaranır:
Sahilin relyef quruluşu
Küləkli hava şəraitində yaranan sıx dalğalar
Açıq dənizdə paralel istiqamətdə hərəkət edən dalğalar sahildəki qayalara və ya bəndlərə çırpıldıqda hərəkət nizamı pozulur. İrəli doğru itələnən sular sahildə toplanmağa başlayır və güclü geri axın əmələ gətirir.
Rip axınları, xüsusilə Türkiyənin Qara dəniz sahillərində tez-tez müşahidə olunur, lakin müəyyən sahil formalarına görə digər dənizlərdə də yarana bilər.
