"Prezidentin İzi ilə" layihəsi çərçivəsində Ağdama təşkil olunan media tur zamanı jurnalistlər 1 nömrəli körpələr evi-uşaq bağçasında olublar.
Teleqraf-ın Qarabağ bürosu xəbər verir ki, Prezident İlham Əliyevin açılışını etdiyi məktəbəqədər təhsil müəssisəsi fəaliyyətə tam hazır vəziyyətə gətirilib.
Qarabağ Regional Təhsil İdarəsinin müdiri Sənan Mənsimli jurnalistlərə açıqlamasında bildirib ki, 160 yerlik bağça binasının inşasına 2024-cü ilin fevralında başlanılıb. 2025-ci ilin fevralında Prezident İlham Əliyev və birinci xanım Mehriban Əliyeva tikinti işlərinin gedişi ilə yerində tanış olublar.
Yeni məktəbəqədər təhsil müəssisəsində uşaqların rahatlığı və keyfiyyətli təlim-tərbiyəsi üçün hərtərəfli şərait yaradılıb. Binada oyun və yataq otaqları, musiqi, rəqs və idman zalları fəaliyyət göstərəcək.
