Son illərdə allergiya və xroniki rahatsızlıqların sürətlə artması alimləri ciddi narahat edir. İsveçrənin Davos şəhərində fəaliyyət göstərən Allergiya və Astma Araşdırmaları İnstitutunun (SIAF) direktoru, Sürix Universitetinin professoru Cezmi Akdiş bildirib ki, müasir həyat tərzi insan orqanizminin təbii müdafiə sistemini zəiflədərək bir çox xəstəliyin yayılmasına səbəb olur.
Türk İmmunologiya Dərnəyi və Bursa Uludağ Universitetinin birgə təşkil etdiyi 27-ci Milli İmmunologiya Konqresində çıxış edən professor, uzun illər üzərində çalışdığı “Epitel Bariyer Nəzəriyyəsi” haqqında danışıb. Onun sözlərinə görə, gündəlik həyatda məruz qaldığımız kimyəvi maddələr və ətraf mühit faktorları insan sağlamlığına düşündüyümüzdən daha ciddi təsir göstərir.
Müasir həyatın görünməyən təhlükəsi
Prof. Dr. Cezmi Akdiş qeyd edib ki, insan orqanizmində dəri, bağırsaq və tənəffüs yolları kimi sahələrdə yerləşən təbii qoruyucu qatlar xarici zərərli maddələrə qarşı əsas müdafiə rolunu oynayır. Lakin hava çirkliliyi, kimyəvi maddələrin çoxluğu, emal olunmuş qidalar və bəzi təmizləyici vasitələr bu qoruyucu sistemi zamanla zəiflədir.
Onun sözlərinə görə, qoruyucu baryer zədələndikdə orqanizmə daxil olmamalı maddələr daha asan şəkildə bədənə keçir və immun sistemi daim “həyəcan vəziyyətində” qalır.
Milyardlarla insan risk altındadır
Dünya Allergiya Təşkilatının xüsusi mükafatına layiq görülən və Harvard Universiteti də daxil olmaqla bir sıra nüfuzlu universitetlərdə fəxri professor olan Cezmi Akdişin hazırladığı nəzəriyyəyə əsasən, astma, ekzema, qida allergiyaları, bağırsaq xəstəlikləri, bəzi metabolik problemlər və otoimmün xəstəliklərin kökündə məhz bu qoruyucu baryerlərin zədələnməsi dayanır.
Alim vurğulayıb ki, son 50-60 ildə allergik və xroniki xəstəliklərin sürətlə artmasını izah edərkən ətraf mühit dəyişikliklərini nəzərdən qaçırmaq mümkün deyil.
“Daha təbii və sadə həyat seçilməlidir”
Professor Akdiş gündəlik vərdişlərin sağlamlıq üçün böyük əhəmiyyət daşıdığını bildirib. O, mümkün qədər az emal olunmuş qida qəbul etməyi, ev yeməklərinə üstünlük verməyi və lazımsız kimyəvi vasitələrdən uzaq durmağı tövsiyə edib.
Onun fikrincə, daha təbii qidalanmaq, çoxlu qatqı maddəsi olan məhsullardan uzaq durmaq və təmizləyici vasitələrdən şüurlu istifadə etmək orqanizmin təbii müdafiə sistemini qorumağa kömək edə bilər.
Alim hesab edir ki, kiçik görünən gündəlik dəyişikliklər uzun müddətdə insan sağlamlığında böyük fərq yaradır.
