Böyük Britaniyada boğulma riski səbəbindən bəzi körpə üzmə halqalarının satışının qadağan edilməsi valideynlər arasında su təhlükəsizliyi ilə bağlı müzakirələri yenidən gündəmə gətirib.
Sherg.az xəbər verir ki, mütəxəssislərin fikrincə, körpələr doğulduqları andan etibarən su ilə tanış ola bilərlər. Lakin bu proses mütləq valideyn və ya xüsusi hazırlıq keçmiş təlimçi nəzarəti altında aparılmalıdır.
Türkiyədə körpələr üçün üzgüçülük təlimləri üzrə mütəxəssis Erengül Özbüğütü bildirib ki, yeni doğulan uşaqlarda nəfəsi saxlama refleksi mövcuddur və buna görə də onların su ilə erkən yaşlarda tanış olması mümkündür. Bununla yanaşı, o, körpələrin boynuna taxılan üzmə halqalarının ciddi təhlükə yaratdığını vurğulayıb.
Onun sözlərinə görə, bu cür vasitələr boyun əzələlərinin zədələnməsinə, uşağın suyun içində çevrilərək boğulma riski ilə üzləşməsinə səbəb ola bilər.
Mütəxəssis qeyd edib ki, körpələrin ilk aylarda istifadə etməli olduğu xüsusi üzmə avadanlığı yoxdur. Bu mərhələdə ən vacib amil valideyn dəstəyidir. Uşaq böyüdükcə bəzi yardımçı vasitələrdən istifadə oluna bilər, lakin onlar da təhlükəsizliyə tam təminat vermir.
Özbüğütü su üzərində istifadə edilən ən etibarlı köməkçi vasitə kimi “makarna” adlandırılan klassik üzmə borularını göstərib. Bununla belə, o vurğulayıb ki, hansı vasitədən istifadə olunmasından asılı olmayaraq, uşaq daim valideynin nəzarətində olmalıdır.
Həmçinin qeyd olunur ki, bazarda satılan bəzi məhsullar oyuncaq deyil, “şəxsi qoruyucu vasitə” kateqoriyasına daxildir və onların istehsalı üçün xüsusi təhlükəsizlik standartları mövcuddur.
Türkiyə Oyuncaqçılar Dərnəyinin sədri Raşit Akar bildirib ki, ölkədə oyuncaq və uşaq məhsulları üzrə idxal nəzarəti dünyanın ən sərt sistemlərindən biridir. Onun sözlərinə görə, məhsulların üzərində istehsalçı və idxalçı məlumatları, eləcə də CE uyğunluq nişanı mütləq olmalıdır.
Ekspertlər valideynlərə naməlum mənbələrdən və nəzarətsiz internet platformalarından alınan məhsullardan uzaq durmağı tövsiyə edir, xüsusilə boyun halqaları və oyuncaq formasında hazırlanmış üzmə vasitələrinin yaratdığı risklərə diqqət çəkirlər.
Mütəxəssislərin yekun qənaəti budur ki, uşaqların su təhlükəsizliyində ən vacib amil heç bir avadanlıq deyil, daimi valideyn və ya təlimçi nəzarətidir.
