Qidaların kiflənməsi əksər hallarda sağlamlıq üçün risk daşıyır və belə məhsulların istehlakı tövsiyə olunmur. Bununla belə, bəzi istisnalar mövcuddur. Mütəxəssislər bildirirlər ki, qidanın növündən və kifin yayılma dərəcəsindən asılı olaraq müəyyən məhsullar kiflənmiş hissəsi çıxarıldıqdan sonra istifadə edilə bilər.
Kif nədir?
Kif rütubətli və isti mühitdə sürətlə çoxalan mikroskopik göbələklərdir. Onlar qidaların səthində rəng dəyişiklikləri, yumşalma və xoşagəlməz qoxu ilə özünü göstərir. Kif sporları havada yayılır və uyğun şəraitdə sürətlə inkişaf edir.
Hansı kiflənmiş qidaları yemək olar?
Sərt pendirlər
Əgər kif istehsal prosesinin bir hissəsi deyilsə, məsələn, çedar, parmezan, asiago və ya pekorino kimi sərt pendirlərdə əmələ gələn kif adətən dərinliyə nüfuz etmir. Belə hallarda kiflənmiş hissənin ətrafından və altından təxminən 2,5 santimetr kəsilərək qalan hissə istifadə oluna bilər.
Kiflə hazırlanan pendirlər
Gorgonzola, Roquefort və Stilton kimi pendirlər xüsusi kif növləri ilə hazırlanır. Bu məhsulların üzərində əlavə səthi kif əmələ gələrsə, həmin hissə kəsilərək qalan hissə istehlak olunur.
Salamurada saxlanılan pendirlər
Feta və ağ pendir kimi salamurada saxlanılan məhsulların səthində yaranan yüngül kif təbəqəsi adətən təhlükəli hesab olunmur. Səth təmizləndikdən sonra məhsulun istifadəsi mümkündür.
Sərt tərəvəz və meyvələr
Kök, kələm, alma və dolmalıq bibər kimi sərt quruluşlu məhsullarda kif adətən yalnız səthdə qalır. Kiflənmiş hissə kifayət qədər dərin kəsilərək çıxarıldıqdan sonra qalan hissənin istifadəsi mümkündür.
Quru kolbasalar və bəzi emal olunmuş ətlər
Bəzi quru kolbasa və qurudulmuş ət məhsullarının səthində kif əmələ gəlməsi normal sayılır. Belə hallarda kif təmizlənərək məhsul istehlak edilə bilər.
Hansı qidaları qətiyyən yemək olmaz?
Mütəxəssislər yumşaq meyvələr, yumşaq pendirlər, yoqurt, mürəbbə, çörək, bişmiş yeməklər və qalıq qidaların kifləndiyi halda tamamilə atılmasını tövsiyə edirlər. Çünki bu məhsullarda kif görünməyən hissələrə də yayılmış olur.
Qida təhlükəsizliyi baxımından ən doğru yanaşma məhsulları düzgün saxlamaq və kiflənmə əlaməti müşahidə edildikdə ehtiyatlı davranmaqdır. Şübhə yarandıqda isə həmin qidanı istehlak etməmək tövsiyə olunur.
