Bu gün güclü və qüdrətli Türkiyə dövləti Sizin rəhbərliyiniz altında fəlakətin nəticələrinin aradan qaldırılması, zərərçəkmiş bölgədə həyatın və iqtisadiyyatın dirçəldilməsi, insanların yeni evlər və iş yerləri ilə təmin olunması istiqamətində genişmiqyaslı quruculuq işləri həyata keçirir.
Bu barədə Prezident İlham Əliyevin Türkiyə Prezidenti Rəcəb Tayyib Ərdoğana məktubunda deyilir.
“Qardaşlıq və vəfa borcumuzun bir parçası olaraq Azərbaycanın da öz növbəsində Kahramanmaraş vilayətində aparılan yenidənqurma və bərpa işlərinə töhfə verərək Türkiyənin yanında çiyin-çiyinə olmağından böyük fəxr və qürur hissi duyuruq”, - məktubda vurğulanıb.
Milli Məclisin deputatı Ceyhun Məmmədov "Sherg.az"a deyib ki, Azərbaycan-Türkiyə münasibətləri strateji müttəfiqlik səviyyəsinə qədər irəliləyib:
"İki ölkə arasında qarşılıqlı səfərlər, davamlı əlaqələr durmadan inkişaf edir. Cənab Prezidentin göndərdiyi məktubda da bu məsələlər əksini tapıb. Türkiyədə zəlzələ baş verərkən ilk dəstək göstərən və onun yanında olan dövlətlərdən biri də Azərbaycan olub. Dövlətimiz bu hadisə ilə bağlı öz mövqeyini və münasibətini açıq şəkildə ortaya qoydu. Həmçinin əsl qardaşlıq nümunəsini göstərdi. Baxmayaraq ki, Azərbaycan hazırda Qarabağda yenidənqurma və abadlıq işlərini davam etdirir, Türkiyəyə də yardım əlini uzatmaqdan çəkinmir. Azərbaycan və Türkiyə Qahmaranmaraş vilayətində bərpa, quruculuq, abadlıq işlərini birgə həyata keçirirlər".
Deputat vurğulayıb ki, tarix boyu hər iki dövlətin bir-birinin yanında olması göz önündədir:
"Azərbaycan II Qarabağ müharibəsində də bunun şahidi oldu. Məhz İlham Əliyevin Ərdoğana ünvanladığı məktubda da vurğulanır ki, Azərbaycan Türkiyənin yanında olmaqdan böyük fəxr və qürur hissi duyur. Hazırda iki ölkə liderinin səyləri nəticəsində dostluq, qardaşlıq əlaqələri daha da güclənir və inkişaf edir. Burada həm Azərbaycan, həm də Türkiyə Prezidentinin xüsusi rolu qeyd edilməlidir".
