Nazirlər Kabinetinin müvafiq qərarına əsasən tətbiq edilən innovativ yenilik olaraq, cari ilin mayın 1-dən Səhiyyə Nazirliyinin “Vahid Səhiyyə İnformasiya Sistemi” vasitəsilə “Sığortaolunanlar üçün xəstəlik vərəqələri” Səhiyyə Nazirliyinin və Tibbi Ərazi Bölmələrini İdarəetmə Birliyinin (TƏBİB) tabeliyində fəaliyyət göstərən tibb müəssisələrində elektron sənəd formasında hazırlanacaq.
Bu barədə Səhiyyə Nazirliyi, Əmək və Əhalinin Sosial Müdafiəsi Nazirliyi və TƏBİB birgə məlumat yayıb.
Bildirilib ki, bundan sonra tibb müəssisələri tərəfindən e-imza ilə təsdiq edilərək, işəgötürənə və Əmək və Əhalinin Sosial Müdafiəsi Nazirliyinin tabeliyindəki Dövlət Sosial Müdafiə Fonduna (DSMF) e-qaydada göndəriləcək.
Həmin e-sənəd DSMF tərəfindən işçiyə müvəqqəti əmək qabiliyyətinin itirilməsinə, hamiləliyə və doğuma görə müavinətlərin təyinatı üçün əsas olacaq.
Bu məqsədlə Səhiyyə Nazirliyi tərəfindən Əmək və Əhalinin Sosial Müdafiəsi Nazirliyi ilə birgə elektron xəstəlik vərəqələrinə dair məlumatlar vahid e-reyestrdə birləşdirilib.
Nəticədə işəgötürənlər bu e-bülletenləri Əmək və Əhalinin Sosial Müdafiəsi Nazirliyinin müvafiq informasiya sistemindən, tibb işçiləri isə “e-Səhiyyə” portalı və mobil tətbiqindən asan və rahat şəkildə əldə edə biləcək.
“E-bülleten” sisteminə keçid qeyd edilən sahədə kağız daşıyıcıların saxlanması və emalı ilə bağlı artıq iş yükünün aradan qaldırılması və vaxt itkisinin minimallaşdırılmasına, xidmətlərin çevikliyinə və keyfiyyətinin, şəffaflığının artırılmasına şərait yaradır.
Həkim-allerqoloq Şahvələd Məmmədov “Sherg.az”a bildirib ki, səhiyyə sistemində elektron resept və bir çox qaydaların elektron vasitəsilə həyata keçirilməsi insanların səhiyyə sistemində uzun müddət vaxt itkisinin qarşısını almaq üçün düzgün seçimdir:
“Elektron sistem vasitəsilə sənədlərin hazırlanması kağız işini azaldır, sənəd dövriyyəsini sürətləndirir və prosesin daha tez yekunlaşmasına şərait yaradır. Bu həm tibb müəssisələri, həm də vətəndaşlar üçün vaxt və resurs baxımından qənaət deməkdir. Elektron sistemlərdə məlumatların izlənməsi və arxivləşdirilməsi daha asandır. Təbii ki, bəzən insanlar ilkin olaraq həkimə müraciət edir, xəstənin vəziyyəti dəyərləndirilir və elektron portala salınır. Xəstənin vəziyyətindən asılı olaraq, xəstəlik vərəqələri üç gündən bir artırılır”.
