İngiltərədə aparılan yeni bir araşdırmaya görə, gənclərin yarıya yaxını internetin mövcud olmadığı bir dünyada yaşamağı üstün tutur.
Sherg.az 16-21 yaş arası gənclər arasında aparılan tədqiqat, iştirakçıların təxminən 70 faizinin sosial mediada vaxt keçirdikdən sonra özlərini daha pis hiss etdiyini üzə çıxarıb.
Respondentlərin yarısı, axşam saat 22:00-dan sonra bəzi tətbiq və saytlara çıxışı məhdudlaşdıracaq bir “rəqəmsal küçəyə çıxma qadağasını” dəstəklədiklərini bildirib. 46 faiz isə, tamamilə internetsiz bir dünyada gənc olmağı üstün tutduqlarını etiraf edib.
Sorğuda iştirak edənlərin 25 faizi gündə dörd və ya daha çox saatını sosial şəbəkələrdə keçirdiklərini bildirib.
İştirakçıların:
42 faizi valideynlərinə internetdə nə etdikləri barədə yalan danışdıqlarını,
42 faizi yaşları haqqında yalan məlumat verdiklərini,
40 faizi saxta və ya "birdəfəlik" hesablar istifadə etdiklərini,
27 faizi isə internetdə tamamilə fərqli biri kimi davrandıqlarını söyləyib.
İngiltərə Standartlar İnstitutu tərəfindən 1.293 gəncin iştirakı ilə keçirilən araşdırmada, respondentlərin 27 faizi onlayn platformalarda yerini (lokasiyasını) tanımadığı insanlarla paylaşdığını etiraf edib.
"The Guardian" qəzetinin məlumatına görə, gənclərin dörddə üçü, pandemiya dövründə internetdə daha çox vaxt keçirdiklərini bildirib. 68 faiz isə onlayn keçirilən zamanın psixoloji sağlamlıqlarına mənfi təsir etdiyini düşünür.
İntiharların qarşısının alınması ilə məşğul olan Molly Rose Fondunun rəhbəri Andy Burrovs, gənclərin onlayn risklərin fərqində olduqlarını və texnologiya şirkətlərindən özlərini qorumaq üçün tədbir görmələrini istədiklərini bildirib.
Burrovs həmçinin əlavə edib ki, alqoritmik sistemlər, bəzən gəncləri özlərinin təqsiri olmadan, tez bir şəkildə zərərli və mənfi məzmunlara yönəldə bilər.
