Son günlər Azərbaycanda kibertəhlükəsizliklə bağlı narahatedici halların artdığı müşahidə olunur. Xüsusilə də böyük şirkətlərin korporativ “WhatsApp” nömrələrinin kibercinayətkarlar tərəfindən ələ keçirilməsi diqqət çəkir.
Belə hallarda fırıldaqçılar şirkət adından əlaqələr qurur, işgüzar yazışmalara müdaxilə edir və rəhbərliklə əməkdaşları şantaj etmək üçün bu imkanlardan istifadə edirlər.
Azərbaycan İnformasiya və Kommunikasiya Texnologiyaları Sənayesi Assosiasiyası (AİKTSA) İdarə Heyətinin sədri Elvin Abbasov Sherg.az-a açıqlamasında bildirib ki, bu, təkcə şirkətlərin reputasiyası və maliyyəsi üçün deyil, həm də müştəri məlumatlarının təhlükəsizliyi baxımından ciddi riskdir:
"Hücum sxemi adətən sosial mühəndislik, fişinq linkləri və ya aldadıcı təsdiq mesajları vasitəsilə həyata keçirilir. Nömrə ələ keçirildikdən sonra şirkət rəhbərliyindən pul tələb olunur və məlumatların yayılması ilə hədələnirlər. Azərbaycan qanunvericiliyinə görə, bu əməllər ağır cinayət hesab olunur və ciddi cəzalar nəzərdə tutur.
Şirkətlər özlərini qorumaq üçün ilk növbədə iki mərhələli təsdiqləmə funksiyasını aktiv etməli, korporativ nömrələrə cavabdeh əməkdaşları maarifləndirməli və şübhəli mesajlara qarşı diqqətli davranmalıdır. Eyni zamanda, “WhatsApp Web” sessiyaları mütəmadi izlənilməli, şübhəli girişlər dərhal bağlanmalıdır. Hücuma məruz qaldıqda isə hüquq-mühafizə orqanlarına vaxtında müraciət etmək, cinayətkarlara heç bir ödəniş etməmək və bütün sübutları toplamaq zəruridir.
Bu hadisələr bir daha göstərir ki, rəqəmsal təhlükəsizlik artıq hər bir qurumun əsas prioritetlərindən biri olmalıdır. Proseslərin və kommunikasiya kanallarının mühafizəsi yalnız texniki tədbirlər deyil, həm də davamlı maarifləndirmə və təşkilati intizam tələb edir. Azərbaycanın rəqəmsal mühitində belə halların qarşısının alınması üçün həm dövlət qurumlarının, həm də özəl sektorun birgə mübarizəsi vacibdir".
