Bu aktual məsələ ilə bağlı Moskva ilə müzakirələrə başlamalıyıq
“Araik və digər erməni cinayətkarlar hələ də Qarabağdadır”. Bunu ötən gün Milli Məclisin iclasında millət deputat Nigar Arpadarai deyib. Parlament üzvü bildirib ki, üçtərəfli bəyanat imzalanandan sonra Ombudsman tərəfindən sülhməramlıların nəzarəti altında olan ərazilərdə monitorinqlər aparılıb-aparılmaması məsələsi qalır.
Deputatın fikrincə, torpaqlarımızda qanunsuz fəaliyyətini davam etdirən ünsürlərdən biri də separaçıların başı Araik Arutyunyandır: “Onlar silahlıdır, bu da ona gətirib çıxarır ki, orada olan azərbaycanlı və erməni əsilli vətəndaşlarımız həmişə risk altındadır. Ona görə hesab edirəm ki, bu məsələdə həm sülhməramlılar, həm də aidiyyəti qurumlarla iş aparılmalıdır”.
Milli Məclis üzvünün qaldırdığı məsələni “Şərq”ə dəyərləndirən Azərbaycan Demokratiya və İnsan Haqları İnstitutunun rəhbəri, hüquq müdafiəçisi Əhməd Şahidov deputat tərəfindən qaldırılan məsələnin aktual olduğunu söyləyib. Ekspert bildirib ki, üçtərəfli müqaviləyə əsasən, Xankəndi və ətraf bölgələr mərhələli şəkildə Azərbaycanın nəzarətinə keçməli idi:
“Separatçıları çıxmaq şərti ilə Qarabağdakı ermənilər Azərbaycan vətəndaşlarıdır. Hazırda həmin bölgə rus sülhməramlılarının nəzarəti altındadır. Ancaq bu, o demək deyil ki, sözügedən bölgədə insan haqları, orada yaşayanların hüquqlarının pozulması ilə bağlı rəsmi Bakı heç bir addım atmamalıdır. Xankəndi və ətrafı Azərbaycan Ordusunun nəzarətinə keçənədək orada Ombudsman və digər inzibati, sosial qurumların nümayəndələri də fəaliyyət göstərməlidir. Hesab edirəm ki, bununla bağlı birbaşa Moskva ilə müzakirələrə başlamalıyıq. Təkcə Ombudsmanın deyil, Xocalı, Xocavənd sakinlərinin də öz torpaqlarına, yurdlarına getməsinə şərait yaradılmalıdır”.
