Aprelin 6-da Brüsseldə Avropa İttifaqı Şurasının rəhbəri Şarl Mişelin Azərbaycan prezidenti İlham Əliyev və Ermənistanın baş naziri Nikol Paşinyanla görüşü planlaşdırılır. Bu barədə Şuranın açıqlamasında bildirilib. Görüşün əyani, yaxud da videokonfrans vasitəsilə baş tutacağı barədə məlumat verilməyib.
Son zamanlarda Avropa İttifaqı və Qərb ölkələri Azərbaycanla müzakirələr aparır, görüşlər təşkil edir. Danışıqlar masasında bir çox nüanslara toxunulur. Bütün bunlar ölkəmizin beynəlxalq nüfuzundan xəbər verir
Avropa-Azərbaycan əlaqələrini “Sherg.az”a şərh edən BDU-nun professoru, politoloq Əlimusa İbrahimov görüşün əhəmiyyətli olduğunu vurğulayıb:
“Avropa həmişə Azərbaycan Prezidenti ilə Ermənistan baş nazirinin görüşünü təşkil etməyə çalışıb. Rusiya da buna cəhd göstərib, amma istənilən nəticəni verməyib. Artıq Avropada İlham Əliyev və Şarl Mişelin görüşəcəklərinə dair məlumatlar verilib. Görüş Rusiyanın nəzarəti olmadan reallaşacaq. Dünya qüvvələri, ABŞ və Avropa dövlətləri çalışıblar ki, birbaşa görüş təşkil etsinlər. Bu tədbirdən gözləntilər çox böyükdür”.
Politoloq Azərbaycanın regionla bağlı amallarından bəhs edib:
“Azərbaycanın qarşıya qoyduğu məqsədlər bölgədə əmin-amanlığın yaradılmasından ibarətdir. O cümlədən, erməni silahlıların torpaqlarımızdan çıxarılmasında çox mühüm rol oynayacaq. Azərbaycanın həqiqətlərini əsaslandırılmasında Avropa Birliyi rol oynayır. Düşünürəm ki, bundan sonra Ermənistanın “rolu”nu daha dərindən başa düşəcəklər”.
