"Ulu Öndər Heydər Əliyev hakimiyyətə gəldikdən sonra, müstəqillk dövründə insan hüquq və azadlıqlarının təminatı ilə bağlı bir çox addımlar atıb".
Bunu "Sherg.az"a açıqlamasında Demokratiya və İnsan Hüquqları Komitəsinin sədri, hüquq üzrə fəlsəfə doktoru Çingiz Qənizadə deyib.
Hüquq müdafiəçisi bildirib ki, ölüm hökmünün ləğvi, əfv institutunun, amnistiyanın tətbiqi və s. məsələlər hər zaman hüquq müdafiəçilərinin diqqətinə olub və alqışlanıb:
"Əfv institutu isə hər il verilməklə yüzlərlə, ümumilikdə isə minlərlə insanın azadlığa qovuşmasına səbəb olacaq bir addımın atılması və bunun ənənə halına çevrilməsinin bünövrəsi Ulu Öndər tərəfindən qoyulub. Ümummilli Liderin anadan olmasının yüzilliyini qeyd etdiyimiz bir dövrdə möhtərəm Prezidentimiz İlham Əliyev tərəfindən Əfv Sərəncamının imzalanması ilə bağlı artıq bir neçə gün idi ki, prosesləri izləyirdik.
Ümidlərimiz bugün reallaşdı. Həm də gözləyirdi ki, budəfəki əfv sərəncamı digərlərindən sayına və tərkibinə görə daha geniş olacaq. Bu, belə də oldu. Əfv İnstitutu tarixində ilk dəfədir ki, 801 nəfər məhkum sərəncamın təsir dairəsinə düşdü. Bunlardan 463 nəfəri azadlıqdan məhrum edilmiş şəxslərdir. 220 nəfəri cəzasının çəkilməmiş hissəsinin yarısından azad olundular. 118 nəfər isə azadlıqdan məhrum etmə ilə bağlı olmayan cəzalardan azad edildilər. Biz hüquq müdafiəçiləri bu cür humanist addımları hər zaman alqışlamışıq. Budəfəki Əfv Sərəncamına görə də cənab Prezidentə öz təşəkkürümüzü bildiririk. Sərəncam sadəcə əfv edilən 801 nəfəri deyil, eyni zamanda onların ailə üzvlərinə, qohumlarına, yaxınlarına da bu sevinci bəxş etdi. O baxımdan onminlərlə insan dövlət başçısına minnətdarlıq edirlər".
Qeyd edək ki, Azərbaycan Prezidenti İlham Əliyev Məhkum edilmiş bir sıra şəxslərin Azərbaycan xalqının ümummilli lideri Heydər Əliyevin 100 illik yubileyi münasibətilə əfv olunması haqqında sərəncam imzalayıb. Sərəncam 801 nəfər məhkuma şamil olunub.
