Xocalı rayonunun Pirlər kəndinin yaxınlığında qanunsuz erməni silahlı dəstəsinin üzvlərinə hərbi geyim və silah paylanılır. Bu barədə Operativ Media teleqram kanalı məlumat yayıb. Onlardan cəmi 200 metr aralıda Rusiya "sülhməramlıları" bu prosesi sakitcə izləyir. Hər an təxribat ola bilər. Qeyd edək ki, rus sülhməramlıları ərazidə sabitlik yaratmaq, qanunsuz hallara imkan verəməmək və təxribatın qarşısını almaq öhdəliyini daşıyır. Lakin terror qruplaşmalarına qarşı tədbir görmür, hətta şərait yaradırlar. Azərbaycan bununla bağlı ciddi addımlar atmalıdır.
Erməni separatçıların silahlanması ilə bağlı “Sherg.az”a münasibət bildirən millət vəkili Elman Məmmədov təxribatın qarşısının alınma yollarını izah edib:
“Necə ki, Fərrux yüksəkliyində mövqelər tutulanda, qeyri-qanuni erməni hərbi birləşmələrinə qarşı tədbir görülüb, eləcə də, leqal olmayan silahlı birləşmələrə və separatçılara qarşı antiterror əməliyyatları keçirilməlidir. Azərbaycan öz ərazisini terrorçulardan tamamilə təmizləməlidir. Bu məsələni həll etməli olan Rusiya və ərazimizdə müvəqqəti yerləşmiş onun hərbi kontingenti məsuliyyətlərini yerinə yetirmədilər. 10 noyabr 2020-ci il tarixli razılaşma var.
Həmin sənəddə açıq şəkildə göstərilir ki, sülhməramlılar qeyri-qanuni silahlanan erməniləri ərazimizdən çıxaracaq. Əksinə, terrorçular tərəfindən baş verən hadisələr elə onların gözü qarşısında baş verir. Hətta himayə edirlər”.
Azərbaycan artıq sülhməramlılara ümid bəsləmir:
“Hesab edirəm, ölkəmiz prosesləri gücləndirəcək ki, terrorçular və silahlanan dəstələr ərazimizdən çıxarılmalıdırlar. Çünki başda Rusiya olmaqla heç bir dövlət, qəbul etməz ki, torpaqlarında separatçı qurum olsun. Biz 44 günlük Vətən müharibəsi bitəndən, yəni 1 il yarımdan çoxdur ki, gözləyirik. 10 noyabr 2020-ci il, 11 yanvar 2021-ci il və 26 noyabr 2021-ci il tarixlərində üçtərəfli görüşlər zamanı bu sənədlər imzalanıb, öhdəliklər götürülüb , tapşırıqlar verilib. Ancaq bunlar çağırış üzərində qalıb”.
