"Azərbaycanın Ermənistanla sərhəd nöqtəsinə nəzarət buraxılış məntəqəsi qurması ən əsas: "Azərbaycan Rusiya ilə birlikdə hərəkət edir"- deyənlərə zərbə oldu".
"Sherg.az" xəbər verir ki, bunu politoloq Azər Qasımov deyib.
Ekspert bildirib ki, Rusiya XİN başçısı Sergey Lavrovun Bakıda bu məsələ ilə bağlı dedikləri yaddaşlardadır:
"Lavrov hansısa texniki qurğuların quraşdırılmasının mümkün olduğunu, amma ətraflı yoxlamanın mümkünsüz olduğunu demişdi. Görünən isə o oldu ki, Azərbaycan buna baxmayaraq sərhəddən keçmək üçün nə prosedur lazımdırsa etdi, yəni başqa ərazilərdə olduğu kimi sərhəd məntəqəsi yaratdı. İlk vaxtlar bəzi güzəştlərə təbii ki, gediləcəyi aydın idi. Amma tədricən bunun da normala dönəcəyi şübhəsizdir. Azərbaycanın Rusiyanın istəyinə rəğmən həm 44 günlük müharibə, həm də sonrakı proseslər onu göstərdi ki, Rusiya böyük ölçüdə bu addımlardan razı qalmadı, amma məcbur olub susmaq yolunu seçdi. Necə ki, indi susur. Əgər Vaşinqton tərəflərlə sülh müqaviləsi üzərində işi yekunlaşdırıb Rusiyanın qarşısına qoyacaqsa və münaqişə tərəfləri də buna razı olacaqlarsa, Rusiyanın bunu qəbul etməkdən başqa yolu qalmayacaq. Böyük ölçüdə problemin son dövrlərini yaşayırıq deyə bilərik".
