Dünən Azərbaycan müdafiə naziri Zakir Həsənov ölkəmizdə rəsmi səfərdə olan Pakistan Silahlı Qüvvələrinin Quru Qoşunları komandanı ordu generalı Qamar Caved Bacvanın rəhbərlik etdiyi nümayəndə heyəti ilə görüşüb. Azərbaycan-Pakistan hərbi əməkdaşlığının inkişaf etməsindən məmnunluğunu ifadə edən general-polkovnik Z.Həsənov Azərbaycanın ədalətli mövqeyini bütün səviyyələrdə, o cümlədən beynəlxalq təşkilatlarda dəstəklədiyinə görə Pakistan rəhbərliyinə və xalqına minnətdarlığını ifadə edib.
Görüşdə hərbi, hərbi-texniki, hərbi-təhsil və digər sahələrdə əməkdaşlığın inkişaf perspektivlərinin müzakirəsi zamanı dağ-təlim heyətinin hazırlanması, həmçinin birgə təlimlərin keçirilməsi barədə razılıq əldə olunub.
İki ölkə arasındakı hərbi əməkdaşlıq barədə “Sherg.az”a danışan ehtiyatda olan polkovnik Şair Ramaldanov artıq 20 ildən çoxdur ki, Pakistanla əlaqələrimizin inkişaf etdiyini bildirib:
“Pakistan ilk islam ölkələrindəndir ki, ərazi bütövlüyümüzü dəstəkləyib və tanıyıb. Bu dövlət Tovuzda baş verən iyul hadisələri zamanı da Azərbaycanın yanında olduğunu bəyan edib.
Pakistanla bütün istiqamətlərdə, o cümlədən hərbi sahədə əməkdaşlığımız inkişaf etdirilir. Müharibə zamanı Türkiyə ilə birgə məhz Pakistan bayrağının da Azərbaycan bayrağının yanında dalğalandığını görürük. Bu, xalqımızın Pakistan dövlətinə olan minnətdarlıq hissidir”.
Ş.Ramaldanov vurğulayıb ki, müharibədən sonra da Pakistanla olan hərbi münasibətlərimiz sürətli şəkildə inkişaf edir:
“Azərbaycan, Pakistan və Türkiyə hərbi hava qüvvələrinin birgə təlimləri keçirildi. Növbəti zamanlarda quru qoşunların da təlimləri planlaşdırılır. Fikrimcə, Pakistanla Azərbaycanın hərbi münasibətləri planlı şəkildə aparılacaq.
Plan əsasında iki ölkənin hərbi iş birliyi öz inkişafına nail olacaq. Pakistan güclü bir dövlətdir və çox böyük silahlı qüvvələri, ordusu və təcrübəsi var.
Ölkəmiz də müharibədən çıxmış təcrübəli qüvvələrə malikdir.
Ona görə Pakistan üçün də Azərbaycan önəmlidir. Pakistanla əvvəllər də hərbi-texniki əməkdaşlıq edirdik. Azərbaycanın hərbi hava qüvvələrində olan təlim təyyarələrindən 9-u məhz Pakistanda istehsal olunub. İki ölkənin hərbi sənaye kompleksi arasında müəyyən sazişlər və birgə proyektlər var. Həmin proyektlər də həyata keçiriləcək.
Ölkələr arasında hərbi sahədə işbirliyi və digər münasibətlər daimi olacaq. Bu, iki dövlət üçün faydalıdır. Mütəmadi görüşlərin keçirilməsi onu göstərir ki, Azərbaycanla Pakistanın hərbi əlaqələri dinamik şəkildə inkişaf edir”.
