Dünən Böyük Britaniyanın Silahlı Qüvvələr üzrə naziri Ceyms Heppi Azərbaycana səfərə gəlib. Bu barədə Böyük Britaniyanın Azərbaycandakı səfirliyindən bildirilib. Bir günlük səfər çərçivəsində britaniyalı nazir Bakıda yüksək səviyyəli görüşlər keçirəcək. Britaniyalı nazirin Prezident İlham Əliyev, müdafiə naziri general-polkovnik Zakir Həsənov və xarici işlər naziri Ceyhun Bayramovla görüşüb. Görüşlərdə Böyük Britaniya ilə Azərbaycan arasında diplomatik münasibətlərin 30-cu il dönümündə iki ölkə arasındakı müdafiə sahəsi ilə bağlı əməkdaşlığın genişləndirilməsi imkanları, Ukraynadakı hazırkı vəziyyət, Ermənistanla bağlı həll edilməyən məsələlər və sülh prosesinin gedişatı müzakirə olunub.
Nazir həmçinin minatəmizləmə sahəsində əməkdaşlığı müzakirə edib.
Britaniyanın Silahlı Qüvvələr üzrə naziri Şəhidlər xiyabanını da ziyarət edib.
Qeyd edək ki, bəzi ekspertlər bu səfərin təsdaüf olmadığını vurğulayırlar. Bunu ötən günlərdə Rusiya Dövlət Dumasının deputatı Mixayıl Delyaginin “Azərbaycanın neft sənayesini bombalamaq lazımdır” hədəsi ilə əlaqələndirirlər.
Səfərin əhəmiyyəti “Sherg.az”a şərh edən Beynəlxalq Münasibətlər və Diplomatiya Araşdırmalar mərkəzinin rəhbəri, siyasi şərhçi Samir Hümbətov rəsmi Moskvanın heç bir halda Azərbaycanın enerji layihələrini vura bilməyəcəyini qeyd edib:
“Rusiya 1994-cü ildə "Əsrin müqaviləsi" imzalanan zaman müəyyən təhdidlər edib, amma bacarmadı. Ondan sonrakı mərhələdə də artıq nəzarət enerji idxalcısı olaraq həm Böyük Britaniya və Avropa ölkələrinin, həm də Türkiyənin birbaşa nəzarətindədir. Bizi İkinci Qarabağ müharibəsi zamanı və ondan əvvəl də Bakı-Tiblisi-Ceyhan neft kəməri, Bakı-Tblisi-Ərzurum qaz borusu ilə bağlı hədələyiblər.
Türkiyə bildirib ki, əgər belə bir hal baş verərsə, o zaman təminatçı ölkə olaraq məsələyə qarışacaqlar. Həmçinin İtaliya ilə sıx əməkdaşlıq və əlaqələrimiz var.
Düşünmürəm ki, Delyagin kimilər hansısa fikir səsləndirsin və bu, reallığa çevrilsin. Təbii ki, Kreml administrasiyasında bəzi dairələr var ki, onların əsas maraq dairəsinə bu cür şantajlar daxildir.
Siyasi şərhçi izah edib ki, C.Heppinin Azərbaycana gəlməsi təsadüf deyil:
“Bəzi nüanslar özünü büruzə verir. Xüsusilə, Rusiya-Ukrayna müharibəsinin kritik vaxtında bunun olmasında işarə var. Azərbaycanın enerji ixracına hansısa formada təsir edəcəyinə inam aşağıdır.
Rusiya istəsə də, bu sektorla bağlı təhlükə yarada bilməz. Başa düşür ki, tək bizə yox, digər ölkələrə qarşı addım atacaq.
TANAP və TAP layihəsi var. Digər dövlətlərlə qazın idxalı və ixracı həyata keçirilir”.
