Bu gün müdafiə naziri general-polkovnik Zakir Həsənov Azərbaycanda səfərdə olan NATO-nun İzmirdə yerləşən Quru Qoşunları Komandanlığının Qərargah rəisi diviziya generalı Metin Tokelin başçılıq etdiyi nümayəndə heyəti ilə görüşüb. Bu barədə Müdafiə Nazirliyindən məlumat verilib. Qonağı salamlayan Z.Həsənov Azərbaycan-NATO əlaqələrinin uğurla inkişaf etdiyini, Azərbaycan Ordusunun müxtəlif proqramlar çərçivəsində fəaliyyətini və hərbi qulluqçularımızın Əfqanıstandakı “Qətiyyətli Dəstək” Missiyasına verdiyi töhfəni diqqətə çatdırıb.
Diviziya generalı M.Tokel Alyansın Azərbaycanı etibarlı tərəfdaş hesab etdiyini xüsusi qeyd edib. O, ölkəmizin terrorizmlə mübarizədə iştirakını, sülhməramlı əməliyyatlar üçün yük daşımalarına önəmli töhfə verdiyini, Əfqanıstanda həyata keçirilən əməliyyatlarda göstərilən peşəkarlığı yüksək qiymətləndirib.
Görüş barədə “Sherg.az”a danışan hərbi ekspert Ədalət Verdiyev bildirib ki, Azərbaycanın NATO ilə əməkdaşlığı 1997-ci ildən başlayıb:
“Azərbaycan bu günə qədər demək olar ki, NATO-nun bütün sülhməramlı fəaliyyətində iştirak edib. Eyni zamanda ölkəmizin hava məkanı davamlı olaraq NATO sülhməramlı fəaliyyətlərinin həyata keçirilməsi üçün açıq elan olunub.
Digər tərəfdən Azərbaycan həm də ABŞ ilə NATO çərçivəsində Əfqanıstandakı sülhməramlı fəaliyyətlərin təmin edilməsi üçün logistik mərkəz rolunu oynayıb.
Yəni həmin təyyarələrin yanacaq və müxtəlif ləvazimat daşınmasında ölkəmizdən istifadə olunub.
Ordumuzun Vətən müharibəsindən sonra kiçik türk ordu modelinə uyğunlaşdırılması mesajını da xatırlayırıq.
Türk ordu modeli dedikdə o başa düşülür ki, Türkiyə NATO-nun ikinci ən güclü ordusudur. Dolayısı ilə bu, həm də ordumuzun NATO standartlarına uyğunlaşdırılması prosesinin başlamasına işarə idi.
Bu görüş məhz Azərbaycanın türk ordu modelinə keçidi, NATO ilə əməkdaşlığın daha da inkişafına xidmət edir. Belə görüşlərin gələcəkdə daha da artacağını gözləmək mümkündür. Yaxın günlərdə ABŞ-ın Azərbaycandakı səfiri də ölkəmizi etibarlı tərəfdaş adlandırmışdı.
Bu zaman ortaya belə bir mənzərə çıxır: Azərbaycanla NATO kontaktları gələcəkdə daha da sıxlaşacaq”.
