Azərbaycan-Pakistan İqtisadi Əməkdaşlıq Palatasının sədri Xürrəm Bhattin münasibətlərdəki yeniliklərdən bəhs edib. Məlumata görə, hər iki ölkənin işğaldan azad edilən ərazilərdə kənd təsərrüfatının inkişaf etdirilməsi ilə bağlı planları var. X.Bhattin açıqlamasında bildirib ki, birgə müəssisələr yaradılması təklif edilir:
“Pakistan çox böyük, inkişaf etmiş aqrar sektora malik olduğundan, Azərbaycanla birlikdə Qarabağda bəzi layihələr həyata keçirə bilər. İki ölkənin şirkətlərinin Gəncədə düyü dəyirmanı açmaq planları da var. Azərbaycan tərəfi ilə birgə müəssisənin açılması ilə bağlı müzakirələr aparılır. Pakistan şirkətləri Qarabağda tikinti işlərində də mühüm rol oynaya bilər. Artıq bununla bağlı bəzi şirkətlər Azərbaycanın müxtəlif institutları ilə danışıqlar aparır. Bu, Azərbaycana əhəmiyyətli dərəcədə birbaşa xarici investisiya gətirə bilər".
Dövlət Gömrük Komitəsinin məlumatına görə bu ilin yanvar-fevral aylarında Azərbaycanla Pakistan arasında ticarət dövriyyəsinin dəyəri 3,4 milyon ABŞ dolları təşkil edib. Bu, ötən ilin eyni dövrü ilə müqayisədə 70 % çoxdur.
Hazırda Azərbaycanda 2 mindən çox Pakistan şirkəti var.
Azərbaycan və Pakistan arasındakı münasibətlərdən “Sherg.az”a bəhs edən politoloq İlqar Vəlizadə işğal zonalarında birgə müəssislərin açılmasını praktiki cəhətdən əhəmiyyətli hesab edib:
“SSRİ vaxtında Ağdam yüngül sənayenin mərkəzlərindən biri olub. Həmçinin Füzulidə pambıq emalı zavodları yerləşib, kənd təsərrüfatı sahəsi inkişaf edib. Ona görə də, həmin regionlarda bu cür müəssisələrin yaradılması zəruridir. Pakistan dünyada yüngül sənayədə malların istehsalı ilə məşğul olan aparıcı qüvvələrdən biridir. Geyim, ayaqqabı, əşyalar və s. orada bol çeşidlidir. Əlbəttə, Pakistanın təcrübəsindən istifadə etmək məqsədəuyğundur".
Politoloq vurğulayıb ki, Pakistandakı bir çox müəssisə dünya brendlərinə aiddir:
“Dünyadakı məşhur müəssilər Pakistanda müəssisələr açaraq mallarını istehsal edirlər. Keyfiyyətləri çox yüksəkdir. Həm İran, həm Avropa bazarlarına çıxardılır. Bu təcrübədən də yararlana bilərik. Burada açıla biləcək fabriklər və müəssisələr böyük yerli xammalın istifadəsi ilə bizə xeyir verəcək”.
