“Müasir nasizmlə faşizmin birləşməsindən yaranmış axmaq məsələdir”
“Heç faşistlər belə bir şey etməyiblər”
Yalnız rus dilini bilənlərin həmvətənlər sırasına daxil edilməsi təklifi ilə Dövlət Dumasına qanun layihəsi təqdim olunub.
Rusiya Dövlət Dumasının saytının yaydığı xəbərə görə təşəbbüs MDB işləri, Avrasiya inteqrasiyası və həmvətənlərlə əlaqələr komitəsi sədrinin birinci müavini Konstantin Zatulin tərəfindən irəli sürülüb.
Qanun layihəsində “vətəndaş” anlayışının yeni variantı təklif edilir. Buna uyğun olaraq, həmvətənlər Rusiya Federasiyasının dövlət dili kimi rus dilində danışan, tarixən şimal qonşumuzun ərazisindəki xalqlara mənsub olan, birbaşa əcdadları Rusiya Federasiyasının ərazisində doğulan və ya yaşayan şəxslər kimi tanınır.
Eyni zamanda, SSRİ-nin dağılmasından sonrakı 30 il ərzində SSRİ vətəndaşlığına malik olmayan yeni həmvətənlər yetişib.
Sənəddə bildirilir:
“Bununla bağlı olaraq, SSRİ vətəndaşlığı ilə əlaqə “vətəndaş” anlayışının tərifindən çıxarılıb.
Əgər dövlət xaricdə yaşayarkən ümumrusiya mədəni kimliyini qoruyub saxlayanlara qayğı göstərirsə, rus dilini bilmək şərtini “həmvətən” anlayışına daxil etmək də təbiidir”. Qeyd edək ki, rəsmi Moskvanın Ukraynada yeritdiyi işğalçı rejim dünyada gərgin vəziyyət yaradıb. Belə çətin situasiyada Rusiyanın “vətəndaş” məsələsi ilə bağlı addımı suallar yaradır. Şimal qonşumuz nələrdənsə qorxduğu və ehtiyat etdiyi üçün bu mövzunu gündəmə gətirə bilər.
Mövcud durumla bağlı “Sherg.az”a açıqlama verən siyasi elmlər doktoru, professor Cümşüd Nuriyev Rusiyanın "vətəndaş" anlayışının yeni variantını başa düşülməyən məsələ adlandırıb:
“Bu mövzunun gündəmə gətirilməsi nəyin ki, rus şovinizmidir, sırf nasizmdir. Rus əcdadları olanların məskunlaşmasından bəhs edilirsə, heç ruslar orada yaşamayıblar. Daha çox türklər, müxtəlif formalarda tatarlar, başqırdlar, kalmıklar, saxalar, buryadlar və s. yaşayıb. Görürük ki, türk mənşəlidirlər. Bu, birbaşa insan hüquqlarının kobud şəkildə pozulmasıdır. Birdən-birə Rusiyanın belə sərsəm ideyanı gündəmə gətirməsi çox şeylərdən xəbər verir. Çünki Lev Qumilyovun əsərində sübut olunub ki, rusların 280 il moğolların əsarəti altında olması onların bütün köklərini dəyişib. Fyodor Dostoyevski, vurğulayırdı ki, rusu qaşısan, tatar olacaq. Genetik olaraq bu mənşədəndirlər”.
Professor Rusiyanı nasist dövlət kimi dəyərləndirib:
“Amma bu rus dili və əcdad məsələsini gündəmə gətirməklə monoetnik dövlət qurmaq istəyirlər. Müasir nasizmlə faşizmin birləşməsindən yaranmış axmaq məsələdir. Heç faşistlər belə bir şey etməyiblər. Rusiya dövlət kimi ağlını itirib. Bu mövzu ilə bağlı söz ehtiyatım çatmır. Hibrid bir millətçilik formasıdır”.
C.Nuriyev bildirib ki, ermənilərin bizimlə bağlı ideyasının gündəmə gəlməsində rus faktoru böyük rol oynayır:
"Şimal qonşumuzdakı erməni diasporunun böyük xidməti var. Rusiya Xarici işlər naziri Sergey Lavrov və digərlərinin səyləri də danılmazdır. Rusiya Dövlət Dumasının gərgin vəziyyətdə belə qanunu müzakirə etməsi ağılasığmazdır. Ad qoya bilmirəm. Ermənilər də deyirdi ki, onlara dünya dəyməsin, yoxsa sivilizasiya batar. Deməli, bu cür düşüncəni rəsmi Moskva təlqin edib.
Ruslar özlərini Allahın seçilmiş bəndələri sayırlarsa, şəfa diləməliyik. Belə vəziyyət onlar üçün çox pis nəticələnəcək”.
