Sabiq nazirə 20 il həbs cəzası verildi

Yunanıstanın sabiq müdafiə naziri Aksi Çohacopulosun bir neçə ay davam edən məhkəmə prosesi başa çatıb. Türkiyə mətbuatı xəbər verir ki, silah alveri və çirkli pulların yuyulmasında günahkar bilinən nazir 20 il azadlıqdan məhrum edilib. Sabiq nazir vəzifədə olduğu 1997-2001 illər arasında Almaniyadan sualtı gəmilərin alınması və Rusiya ilə bağlanan silah müqavilələri qarşılığında 55 milyon avro rüşvət almaqda günahkar bilinib. Qeyd edək ki, oxşar iddia ilə mühakimə olunan 16 nəfərə 6 - 16 il azadlıqdan məhrum etmə cəzası verilib. Nazirin həyat yoldaşı və qızı isə hər biri 12 il olmaqla cəza alıblar. Keçmiş müdafiə naziri artıq bir dəfə başqa işlə bağlı 8 il azadlıqdan məhrum edilib. O zaman keçmiş nazir 520 min avro cəriməni ödəyəndən sonra əmlakı müsadirə edilməklə əfv edilib. Həmin vaxt məhkəmə onu gəliri haqqında saxta bəyannamə təqdim etməkdə mühakimə etmişdi.