"Müəllimlərin attestasiyadan keçirilməsi onların öz üzərlərində işləməsinə şərait yaradacaq”.
Bunu Sherg.az-a müəllimlərin attestasiyasının keçirilməsi ilə bağlı Təhsil Nazirliyində İşçi qrup yaradılmasını şərh edərkən Azad Müəllimlər Birliyinin sədri Məlahət Mürşüdlü deyib.
O, müəllimlərin attestasiyasının vacib və gündəm məsələsi olduğunu diqqətə çatdırıb:
"Attestasiyanın əsasnaməsi və mexanizmi ilə hələlik yaxından tanış deyilik. Bu səbəbdən İşçi qrupun yaradılması haqqında imzalanan sənədə və bu prosesin necə həyata keçiriləcəyinə münasibət bildirmək bir qədər çətindir. Attestasiya prosesinin Təhsil Nazirliyi, məktəb, yoxsa rayon təhsil şöbələri səviyyəsində həyata keçiriləcəyi bilinmir. Lakin müəllimlərin attestasiya prosesi nəticəsində müəllimlərimizin motivasiyasının artırılacağı məlumdur. Sözsüz ki, hər sahədə peşəkarlıq zamanın tələbi olan vacib məsələdir. Bu mənada düşünürəm ki, həmin yeniliyin sayəsində müəllimlərimiz öz üzərlərində işləyəcək, müasir standartlara cavab verən pedaqoji fəaliyyət sərgiləməyə çalışacaqlar”.
Qeyd edək ki, müəllimlərin attestasiyasının keçirilməsi ilə bağlı Təhsil Nazirliyində İşçi qrup yaradılıb. Müəllimlərin qiymətləndirilməsi məqsədilə keçiriləcək attestasiyanın yekun nəticəsinə görə peşəkarlıq səviyyəsi yüksək olan müəllimlər işdə qalacaq, aşağı olanlar işdən azad olunacaqlar.
Aysel Aslan
