"BakuBus”un mətbuat xidmətinin rəhbəri Mansur Piriyev paytaxtımızda avtobusları çirkləndirən sərnişinlərə qarşı tədbirlərə başlanıldığını deyib. Onun sözlərinə görə, marşrut xəttindən qaraja qayıdan avtobusların salonuna diqqət yetirərkən heyrətlənməmək, təəssüf hissi keçirməmək mümkün deyil.
"Gecə boyu xüsusi mütəxəssislər tərəfindən mərhələli şəkildə təmizlənib səhər xəttə buraxılan avtobusun salonunda gecə yarısı qayıdarkən nələr aşkar olunmur? Müxtəlif növ məişət tullantıları, salfetkalar, siqaret kötükləri, kağız parçaları, meyvə və ərzaq qalıqları və s. Ən ürək ağrıdan məqam isə oturacaq və salonun digər hissələrinin məsuliyyətsiz sərnişinlər tərəfindən yazılması, cızılması və qalıcı xəsarətlərin yetirilməsidir”.
Bununla bağlı araşdırmaların aparıldığını deyən M.Piriyev kamera görüntülərindən istifadə edilərək bu cür hərəkətlərə yol verən sərnişinlərin kimliyinin aşkar olunduğunu diqqətə çatdırıb: "Həmin sərnişinlər haqqında qanunvericiliyin tələblərinə uyğun olaraq müvafiq tədbirlər həyata keçiriləcək”.
Ümumi təmizliyə əməl etmək bütün sərnişinlərin borcu olsa da, bunu qəbul etməyənlər kifayət qədərdir. Hətta avtobusda olan bəzi valideynlər övladları qarşısında təmizliyi qorumur, müxtəlif məişət tullantılarını avtobusa və yola atır, bununla da ictimai mədəniyyəti övladına aşılamaqdan boyun qaçırır. Bəs görəsən, təmizliyə riayət etməyən sərnişinlər üçün hansı profilaktik tədbirlər görülməlidir?
Avtobusu çirkləndirdikləri üçün sərnişinlərə cərimə tətbiqinin çətin olduğunu deyən "Digesta” hüquq firmasının direktoru, yol hərəkəti üzrə ekspert Ərşad Hüseynov həmçinin müvafiq tədbirlərin də yerinə yetirilməsinin qəliz olduğunu söylədi:
"Çünki həmin tədbirləri görmək üçün sərnişinləri dəqiq müəyyən eləmək lazımdır. Bu isə kifayət qədər çətindir. Tutaq ki, "BakuBus” avtobuslarında kamera var, amma hər dəqiqə kameraya baxıb təmizliyə kimin əməl etmədiyini müəyyənləşdirmək olmur. Sonradan onu görəndə isə həmin adam artıq avtobusu tərk etmiş olur. Əsasən profilaktik tədbirlərə diqqət yetirilməlidir. Sərnişinlərə avtobusun ictimai əmlak olduğunu çatdırmaq, mədəni və səliqəli olmalarını bildirmək lazımdır. Həmçinin bu üsulla təbliğat və təşviqat aparılmalıdır. Bir də konkret faktlar olanda, həmin insanları məsuliyyətə cəlb eləmək olar. Əgər kimsə avtobusa zibil tökürsə, həmin şəxsdən onu yığışdırmağı tələb etmək lazımdır. Ölkəmizdə məişət tullantılarının lazım olmayan yerlərə atılmasına görə məsuliyyət var. Bunu tətbiq eləmək olar. Amma hansısa oturacağın yazılmasına görə bunu tətbiq etmək olmur. Bu zaman ancaq vurulmuş ziyanın ödənilməsindən söhbət gedə bilər”.
Yeganə Bayramova
