"Yeni Bakı” yaşayış kompleksi sakinlərinin sosial şəbəkələrdə yayımladığı məlumatlar müzakirələrə səbəb olub. Qazın verilməməsindən şikayətlənən vətəndaşlar uşaqların donduğunu, evdə palto, papaq, şərf və əlcəklə oturduqlarını bildiriblər.
Sakinlərdən biri isə mənzillərə qaz verilməməsinə etiraz əlaməti olaraq eyvanından "Biz donuruq, binaya qaz verin” yazılmış plakat asıb.
Vətəndaşlar həmçinin binanı inşa edən İDF MMC şirkətinin bütün sakinlərdən 700 manat sayğac pulu yığdığını da bildiriblər: "Qazımız yoxdur, işığın və suyun pulunu şirkət özü yığır. Cana yığılmışıq, bizə kömək edin”.
Qeyd edək ki, bu günlərdə "Yeni Bakı” sakinlərindən bir qrupu toplaşaraq şəhərcikdə etirazlarını bildirmişdilər. Onlar səslərinin dövlət qurumlarına çatdırılmasını istəyirdilər.
"Azəriqaz” İstehsalat Birliyinin ictimaiyyətlə əlaqələr şöbəsinin müdiri İbrahim Kəlbiyev isə Birliyin təbii qazın satışı ilə məşğul olan bir qurum olaraq bütün texniki, normativ və təhlükəsizlik tələblərinə cavab verən, zəruri sənədləri təqdim edən istənilən çoxmərtəbəli binaya qazın verilməsinə hər zaman hazır olduğunu bildirib. Şöbə müdirinin sözlərinə görə, plakatı asan vətəndaşlar MTK ilə əlaqə saxlayıb problemin nədən ibarət olduğunu araşdırmalı, həmçinin
lazımlı sənədlərinin qaydasında olub-olmamasını dəqiqləşdirməlidirlər:
"Yaşayış binası tikilir və Dövlət Qəbul Komissiyası tərəfindən həmin binanın istismarı qəbul olunur. Bundan sonra qaz təsərrüfatı qurulur, binanın dayanıqlığı barədə zəruri sənədlər Komissiya tərəfindən yığılır və "Azəriqaz” İstehsalat Birliyinə təqdim olunur. "Azəriqaz” İB də mənzildə çəkilmiş qaz təsərrüfatına baxış keçirir və texniki təhlükəsizlik qaydalarına cavab verirsə, hər bir mənzildə qazın açılmasını təmin edir”.
"Azəriqaz” İB-nin çoxmərtəbəli binalarda təbii qazın verilməsi istiqamətində fəaliyyətinin bu gün də davam etdiyini deyən İ.Kəlbiyev bu ilin yanvar ayı ərzində çoxmərtəbəli binanın qazla təmin edildiyini deyib:
"Görülən işlərin nəticəsidir ki, birlik 2017-ci ilin yanvar ayında hüquqi və texniki şəxslərin müraciətini araşdıraraq müvafiq sənədləri təqdim edilmiş 31 çoxmərtəbəli binaya təbii qazın açılmasını təmin etmişdi. Həmin binalarda 1841 ailə yaşayır. Ümumilikdə götürəndə isə 2016-ci il ərzində 397 çoxmərtəbəli binaya təbii qazın verilməsi təmin edilib ki, bu da 15580 mənzili əhatə edib”.
Yeganə Bayramova
