Azərbaycanda bayram günlərində havanın necə keçəcəyi açıqlanıb.
Milli Hidrometeorologiya Xidmətinin rəisi Umayra Tağıyeva Oxu.Az-a açıqlamasında dekabrın 31-də və yanvarın 1-nə keçən gecə ölkə ərazisində hava şəaitinin mülayim keçməsi gözlənir:
“Dekabrın 31-də Bakıda və Abşeron yarımadasında hava şəraitinin dəyişkən buludlu olacaq.
Arabir tutulacağı, əsasən yağmursuz keçəcəyi gözlənilir. Gecə və səhər bəzi yerlərdə duman, çiskin olacaq. Mülayim cənub-qərb küləyi saniyədə 7-15 metr sürətlə əsəcək. Havanın temperaturu gündüz 8-10 dərəcə isti olacaq. Dekabrın 31-dən yanvarın 1-nə keçən gecə temperatur 4-6 dərəcə isti olacaq”.
U.Tağıyeva qeyd edib k, bayram günlərində güclü külək gözlənirmir:
“Bəzi yerlərdə arabir duman olacaq, mülayim qərb küləyi əsəcək. Yanvarın 3-də və yanvarın 4-nə keçən gecə çiskin olacaq. Bu günlər ərzində havanın temperaturu gündüz saatlarında 7-9 dərəcə, gecə isə 2-5 dərəcə arasında dəyişəcək. Yanvarın 4-də Quba və Xaçmaz bölgəsində çiskinli az yağıntı olma ehtimalı var. Aran rayonlarında gecə havanın temperaturunun 3 dərəcə, gündüz isə 7-10 dərəcə olması gözlənilir”.
“Dağlıq ərazilərdə və Naxçıvan Muxtar Respublikasında gecə saatlarında 2 dərəcə şaxtadan 3 dərəcəyə kimi isti olacaq. Qarağabda - Xankəndi, Şuşa, Xocalı, Xocavənd, Zəngilan, Qubadlı, Kəlbəcər, Laçın və Ağdamda yaxın 3-4 gün ərzində hava yağmursuz və xoş keçəcək. Havanın temperaturu gecə 5 dərəcə şaxtadan 2 dərəcəyə, gündüz isə 6 dərəcəyə kimi isti olacağı gözlənilir”, - deyə o qeyd edib.
