Bolqarıstan Prezidenti Rumen Radev yay tətilindən sonra ilk iş günündə parlamentin deputatlarına müraciətlə çıxış edib.
Bu barədə TASS məlumat yayıb.
Ölkə başçısı parlament tribunasından hökuməti və baş prokuroru istefaya səsləyib.
Hakim koalisiya təmsilçiləri, “Birləşmiş Vətənpərvərlər” koalisiyası, həmçinin digər bir sıra siyasi partiya təmsilçiləri prezidentin çıxışından əvvəl zalı tərk ediblər.
“Qaçmaq sizi rüsvayçılıqdan xilas etməz. Bu, əsl parlamentin xaricdə olduğunu sübut edir”, - prezident deputatların hərəkətinə reaksiya verib.
R.Radev ölkənin dərin bir mənəvi və institusional böhran içində olduğunu qeyd edib. O, bildirib ki, əgər parlament icraedici hakimiyyətə tam nəzarət edə bilsəydi, qəzəbli insanlar küçələrə çıxmazdı.
O, parlamenti Baş nazir B.Borisovun iradəsinin icraedicisi adlandırıb, parlamentdə heç kimin baş prokurora ciddi suallar verməyə cəsarət etmədiyini vurğulayıb.
