Böyük Britaniya qarşıdakı dörd il ərzində Ümumdünya Səhiyyə Təşkilatına 340 milyon funt sterlinq vəsait ayıracaq.
“The Telegraph”ın məlumatına görə, bu sözləri BMT Baş Assambleyasının 75-ci sessiyası çərçivəsində çıxışında Böyük Britaniyanın Baş naziri Boris Conson deyib.
Britaniyanın ayırdığı məbləğ əvvəlki illərdəkindən 30 faiz artıq olacaq. Bu yolla ÜST-dən çıxmaq və maliyyələşməsini dayandırmaq qərarına gələn Donald Trampın fəaliyyətlərinin verdiyi itki kompensasiya ediləcək. Vəsait ayrılması ÜST-ün gələcək fəaliyyətindən, həmçinin qurumun pandemiyanın əvvəlində tənqidlərə məruz qaldığı sahələrdə islahatlar aparıb-aparmayacağından asılı olacaq.
Daha 500 milyon funt dünyanın ən kasıb 92 ölkəsinə yardım məqsədilə xərclənəcək. Vəsait sözügedən ölkələrin peyvəndlə təmin edilməsi və infeksiya ilə mübarizəsinə yönəldiləcək.
