Azərbaycan əhalisinin yarıdan çoxu yerli icra hakimiyyətlərinə və məhkəmələrə etibar etmir.
"Sherg.az" xəbər verir ki, bu dövlət qurumu olan Sosial Tədqiqatlar Mərkəzinin (STM) keçirdiyi sonuncu rəy sorğusunda məlum olub.
Şəhər və rayonların icra başçıları: İşlədiyi müddət, doğulduğu yer və tarix - SİYAHI
STM-in məlumatına görə, sorğuda məlum olub ki, hakimiyyətin digər qolları (qanunverici və məhkəmə hakimiyyəti) ilə müqayisədə respondentlərin mütləq əksəriyyəti (94.7 faiz) ölkə Prezidentinə etibar edir. Prezidentə “tam etibar edirəm” deyənlər isə 90,8 faiz təşkil edir. Rəyi soruşulanlar arasında parlamentə etibar edənlər isə 57,4 faiz olub.
Sorğuda ən maraqlı nəticələr əhalinin yerli icra hakimiyyətləri və məhkəmələrə münasibətini öyrənəndə ortaya çıxıb. Məlum olub ki, respondentlər arasında yerli icra hakimiyyətinə etibar edənlər cəmi 46,2 faiz, məhkəməyə etibar edənlər isə cəmi 49%-dir. Başqa sözlə, rəyi soruşulanların yarıdan çoxu bu qurumlara etibar etmir.
Sorğunun nəticələri ilə bağlı açıqlamada bu rəyin səbəbləri ilə bağlı məlumatm göstərilməyib. Amma “Hansı sahədə daha çox islahatlara ehtiyac var?” sualına cavab verənlərin yarıdan çoxu icra hakimiyyətinin (53.7 faiz), 45,7 faizi isə məhkəmələrin adını çəkib. «Bu nəticə onu deməyə əsas verir ki, hələ də yerlərdə icra hakimiyyətlərinin fəaliyyətləri qənaətbəxş deyil və vətəndaşlar tərəfindən səmərəli qiymətləndirilmir»-deyə STM-in açıqlamasında bildirilir.
Qeyd edək ki, mart ayında keçirilən ictimai rəy sorğusunda ümumilikdə 1212 respondent iştirak edib. Respondentlər təsadüfi qaydada seçilmiş 101 klasteri təmsil ediblər.
Sorğu arealı aşağıdakı iqtisadi-coğrafi rayonlarda həyata keçirilib: Bakı, Abşeron, Quba-Xaçmaz, Dağlıq Şirvan, Şəki-Zaqatala, Aran, Gəncə-Qazax, Yuxarı Qarabağ, Lənkəran. Sorğu Naxçıvan Muxtar Respublikasında və işğal edilmiş regionların ərazisi istisna olmaqla bütün ölkəni əhatə edib. Eyni zamanda, işğal edilmiş rayonların etnik azərbaycanlı əhali qrupu da sorğuya cəlb olunub.
