Dövlətimiz pandemiya ilə mübarizədə ardıcıl tədbirləri davam etdirir. Əhalinin sağlamlığının qorunması üçün bütün üsullardan istifadə olunub. Xəstəliyin Azərbaycanda yarada biləcəyi təhlükənin qarşısının alınması, profilaktik və təxirəsalınmaz tədbirlərin həyata keçirilməsi mühüm faktdır.
Hər birimizin ən başçlıca vəzifəsi virusun yayılmasına imkan verməmək, məsuliyyətli olmaqdır. Təəssüf ki, ictimai nəqliyyatda və insanların sıx olduğu digər məkanlarda maskadan istifadə etməyən vətəndaşlar var.
Əksər insan mövcud təhlükəni aydın təsəvvür edə bilmir. Bu baxımdan özünün və ailəsinin sağlamlığına laqeyd yanaşır. Halbuki Ümumdünya Səhiyyə Təşkilatı (ÜST) payız və qış mövsümündə virusun daha təhlükəli və kəskin ola biləcəyinə dair açıqlama verib. Bu barədə dünya ölkələri məlumatlandırılıb.
Azərbaycan Diabet Liqası İctimai Birliyinin sədri, Səhiyyə Nazirliyi yanında İctimai Şuranın üzvü Yeganə Sultanova “Sherg.az”a bildirib ki, bəzi vətəndaşlarda sanki “virus bitib, daha yoluxma olmayacaq” kimi düşüncәlәr var.
Əhalinin bu cür düşünməsinin çox yalnış və təhlükəli fikir olduğunu vurğulayan birlik sədri deyib ki, hәlә dә istənilən şəxs virusa yoluxa bilər:
“Hәtta müalicә alıb sağalanların belə yenidәn yoluxma riski var. Virusun ikinci dalğası istisna edilmir. Karantin rejimi bitəndən sonra da insanlar sosial izolyasiya qaydalarına əməl etməlidirlər.
Əks halda aktiv “COVİD 19” daşıyıcısı olduğundan bixəbər xəstə virusun 2-ci dalğası üçün zəmin yarada bilər. Bundan əlavə koronavirus infeksiyasına yoluxub sağalan xәstәlәr var ki, onlar müalicә bitdikdәn sonra mütlәq şәkildә evdә izolyasiya qaydalarına әmәl etməlidir. Pandemiya ümummilli məsələdir. Birlik göstərib bu xəstəliyə qalib gəlmək lazımdır. Bunun üçün ilk növbədə tələb olunan qaydalara əməl etmək lazımdır”.
