Rusiya Prezidenti Vladimir Putin Azərbaycan Yazıçılar Birliyinin katibi, detektiv romanların müəllifi Çingiz Abdullayevin “Dostluq” ordeni ilə təltif edilməsi haqqında sərəncam imzalayıb.
Bu barədə “Moskva-Bakı” nəşri xəbər yayıb.
Çingiz Abdullayev, əsasən, siyasi və psixoloji detektiv janrında olan əsərlərini rus və Azərbaycan dillərində yazır.
Onun ədəbi fəaliyyəti “Vals” (1981) və “Bir tikə çörək” (1981-1982) kimi bir neçə lirik hekayə ilə başlayıb. İlk böyük əsəri “Mavi mələklər” 1988-ci ildə dərc olunub. Sonradan “Əclafların qanunu”, “Əclafların kredosu” və “Əclafların vicdanı” adlı trilogiyası işıq üzü görüb.
2002-ci ildə rusiyalı kinematoqrafçılar bu əsərin əsasında “Dronqo” serialını çəkiblər.
Çingiz Abdullayev, ümumilikdə, 194 adda kitabın müəllifidir.
