Azərbaycan, Ermənistan və Rusiya dövlət başçıları tərəfindən imzalanan Dağlıq Qarabağ bəyannaməsi Yerevanı istənilən ərazi iddiaları hüququndan məhrum edir və “Dağlıq Qarabağ Respublikası” separatçı layihəsinə son qoyur.
Bunu “Info24”ə müsahibəsində politoloq, beynəlxalq münaqişələr üzrə ekspert Yevgeni Mixaylov deyib.
O, hesab edir ki, ikinci erməni dövləti layihəsi və onun müstəqilliyinin perspektivləri barədə məsələ artıq bağlanıb.
“Aydındır ki, Dağlıq Qarabağda döyüşlərin dayandırılmasına dair imzalanmış üçtərəfli razılaşmada status məsələsinə baxılmayıb. Bu, çox güman ki, heç bir müstəqillikdən söhbət getməyəcəyi və ikinci bir erməni dövləti olmayacağı anlamına gəlir. Yerevan öz ambisiyaları səbəbindən böyük məğlubiyyətə uğrayıb və özünə gəlməsi çox uzun vaxt aparacaq (əgər bu baş verəcəksə). Ermənistana bunu etiraf etmək ağırdır, o, hələ uzun müddət tanınmamış ərazi və keçmiş separatçı hökumətlə bəzi oyunlar oynamağa çalışacaq, amma bu başqa bir ümidsizlik hekayəsidir”, - deyə siyasətçi bildirib.
Ekspert qeyd edir ki, müqavilənin imzalanmasından sonra Yerevanda başlayan iğtişaşlar Ermənistan dövlətçiliyinin qeyri-sabitliyinə dəlalət edir.
“Bu, ilk növbədə demokratiyadan deyil, kütlələrə və xüsusən millətçilər və faşistlərə həddindən artıq iradə verilmiş siyasi partiyalara nəzarət qabiliyyətinin tamamilə itməsindən xəbər verir. Əhalinin Paşinyanı parçalamaq istəyi başa düşüləndir: o, ölkəsini tamamilə yoxsulluq və məğlubiyyətə gətirdi, halbuki xalqa rusofobiya müqabilində Qərbdən gələn ləzzətli “peçenyelər” də daxil olmaqla fərqli bir tale vəd etmişdi. Yerevanın strateji tərəfdaşına xəyanəti faciəli nəticələrə gətirib çıxardı. Və münasibətlərin soyumasına baxmayaraq, yenə də Ermənistanı tam çöküşdən xilas edən Moskva oldu”, - Mixaylov bildirib.
Belə bir vəziyyətdə Ermənistan parlamentinin sədri Ararat Mirzoyanın Yerevan nümayişçiləri tərəfindən döyülməsi isə politoloqu təəccübləndirməyib.
“Bəli, bu barbarlıqdır, amma nağıllara inanan və nəticədə inamını itirən insanlardan, ilk növbədə Dağlıq Qarabağ məsələsində on illərdir aldadılanlardan başqa nə gözləmək olar? Həlak olan minlərlə gənc – bu Paşinyan rəhbərliyinin savadsızlığının əvəzidir. Yekunda ehtimal vermək olar ki, bu mərhələdə Ermənistan kiməsə ərazi iddiasını unuda bilər”, - deyə politoloq sözlərini yekunlaşdırıb.
