"Kanal S"in efirində aparıcı Nigar Fərhadın “Mən oğluma atası olmayan qızı ala bilmərəm” fikri birmənalı qarşılanmayıb. Onun fikrini cəmiyyətin müxtəlif təbəqəli insanları, ictimai xadimlər, şəhid ailələri, cəmiyyətdə önəmli mövqeyə malik insanlar sərt tənqid edib. Onlar sosial şəbəkələrdə aparıcının sərt cəzalandırılmasını tələb ediblər.
Rezonans doğuran bu məsələ ilə bağlı "Kanal S"in Baş direktor müavini Ramin Mustafayev Manset.az-a açıqlamasında irəliləyən dəqiqələrdə Nigar Fərhad haqqında tədbir görüləcəyini bildirib:
"Bu barədə kanalımızın baş direktorunun da məlumatı var. Bəli, bununla bağlı tədbir görüləcək. Hələki qərarı gözləyirik".
Məsələ ilə bağlı Audiovizual Şura açıqlama yayıb:
"Kanal S" televiziyasında yayımlanan "Sözün bitdiyi an" programında aparıcının səsləndirdiyi subyektiv fikirlərdən narahatlığımızı bildirir və qınayırıq. Məsələ ilə bağlı araşdırma aparılacaq, qanun çərçivəsində müvafiq tədbir görüləcək və əlavə açıqlama veriləcəkdir".
Mövzu ilə bağlı "Sherg.az"a danışan sosioloq Lalə Mehralı söyləyib ki, aparıcılar efirdə aparıcıdan başqa hər şey olmağa çalışırlar:
“Onlar müstəntiq, istintaqçı və hakim kimi fəaliyyət göstərirlər. Bir sözlə hərşeyşünas olurlar. Ümumiyyətlə aparıcıları efirə hansı kriteriyalarla seçdikləri bəlli deyil. Bax, bu gün cəmiyyətə qaranlıq olan budur. Çünki aparıcı kimi bizə sırınan o şəxslərin əksəriyyəti aparıcılıqla bağlı minimum bilgilərə belə sahib deyil. Əvvəllər aparıcılar müəyyən mərhələlərdən keçirdilər. Amma bu gün ya fiziki özəlliklərinə görə, ya da sponsor bazasına görə seçirlər. Yəni əgər verilişi layihəsi hər hansı bir sponsor tərəfindən dəstəklənirsə, maliyyə ayrılırsa, ona hər yerdə yaşıl işıqdır. Hətta hər şey haqqında münasibət bildirməyi haqları bilirlər. Eyniz zamanda efirə qonaq çağırır, qonağa danışmağa imkan vermir, təhqir edir və efirdən qovurlar. Əgər kriteriya süzgəci olsaydı, bu gün efirlərimizdə o addımı atmağa heç kəsin haqqı çatmazdı. Çox təəssüf ki, bu addımları atan aparıcılar haqqında heç bir tədbir görülmür”.
