Şəhidin adından istifadə edib pul yığan şəxs saxlanılıb.
DİN xəbər verir ki, fevralın 27-də şəhidin adından istifadə edib pul yığılması barədə polisə məlumat daxil olub.
Pirallahı Rayon Polis İdarəsinin əməkdaşları tərəfindən aparılan araşdırmalarla şəhidin adına videogörüntü paylaşılaraq pul toplanılması müəyyən edilib.
Polis əməkdaşlarının keçirdikləri tədbirlərlə bu əməli törətməkdə şübhəli bilinən paytaxt sakini, 23 yaşlı Nəbi Cəfərov müəyyən olunaraq saxlanılıb.
Araşdırma aparılır.
Mövzu ilə bağlı "Sherg.az"a danışan sosioloq Lalə Mehralı söyləyib ki, şəhidlərin, fiziki məhdudiyyətli insanların şəklini paylaşaraq pul yığan şəxslər ilə çox rastlaşırıq:
“Bu üsullar ilə insanlar asan yolla varlanmağın hər variantını yoxlayırlar. Texnoloji imkanlar da bu cəhətdən onlara kömək edir. Monitor arxasında hər cür hadisə, və xəstəlik uydurmaq mümkündür. Çünki səni kimsə görmür. Bu səbəblə də foto və video ilə paylaşım edib insanların mərhəmətindən istifadə edirlər. Bizim insanlarımız da həddindən artıq mərhəmətli və ürəyi yumşaq olduğuna görə bu cür vəziyyətlərə biganə qala bilmirlər. Əksər insanlar kömək edib və sonradan fırıldaqçı olduğunu anlayıb. Yəni bunu ilk baxışda anlamaq olmur. Çünki insanlar mərhəmətinə və qarşı tərəfin ehtiyacının böyüklüyünə inanaraq kömək edir. Ümumiyyətlə onlayn yardımlaşma statuslarının yerli İcra Orqanının təşkilatçılığı ilə olması daha yaxşıdır. Hər hansı bir icra orqanı buna rəy verməli və o rəyin əsasında paylaşım edilməlidir. Hamı da bilməlidir ki, əgər müəyyən edilmiş orqan buna rəy veribsə, demək ki, fırıldaqçı deyil. Amma belə başa düşürəm ki, bu cür fırıldaqçıların o rəyin də saxtasını yaratma imkanları var. Çünki beyinləri normal insan beynindən fərqli işləyir. Onlar asan pul qazana bilmək üçün hər yoldan istifadə edə bilirlər. Həmin insanların mənəviyyatları, əxlaqları və həyaları yoxdu. Artıq ustalaşıblar və yaxın günlərdə milli qəhrəman Hökumə xanımın atasının kartından pul çəkmişdilər. Dövlət həmin fırıldaqçını anında tapdı, və pulu geri qaytardı. Demək ki, müdaxilə etmək əslində mümkündür. Ona görə də Hüquq mühafizə orqanları mümkün variantlarda müdaxilə etməlidir”.
