Gürcüstanın Müdafiə Nazirliyi mehriban qonşuluq münasibətləri çərçivəsində Azərbaycan və Türkiyənin müdafiə nazirlikləri ilə əməkdaşlığı davam etdirir.
Teleqraf-ın yerli bürosu xəbər verir ki, bu barədə Gürcüstanın Baş naziri İrakli Kobaxidzenin illik hesabatında bildirilib.
“Regional təhlükəsizliyin möhkəmləndirilməsi və silahlı qüvvələr arasında sıx əlaqələrin qurulması məqsədi daşıyan Azərbaycan-Türkiyə-Gürcüstan üçtərəfli əməkdaşlıq formatı uğurla fəaliyyət göstərir”, - sənəddə deyilir.
Hesabatda vurğulanıb ki, 2024-cü ildə Gürcüstan Azərbaycan-Türkiyə-Gürcüstan müdafiə nazirlərinin üçtərəfli görüşünə və “Eternity” üçtərəfli təliminə ev sahibliyi edib.
Qeyd edək ki, İ.Kobaxidze illik hesabatı iyunun 27-də parlamentdə təqdim edəcək.
