Qarşılıqlı texnologiya transferi Türkiyənin yerli müdafiə sənayesini gücləndirəcək
Türkiyə Prezidenti Rəcəb Tayyib Ərdoğan İtaliyanın Baş naziri Corciya Meloninin dəvəti ilə IV Türkiyə-İtaliya Hökumətlərarası Zirvə Toplantısında iştirak etmək üçün İtaliyanın paytaxtı Romaya gedib. İtaliya mətbuatı iki şəxsiyyətin görüşünə geniş yer verib və Prezident Ərdoğanın Romaya səfərini İtaliya ilə Türkiyə arasında münasibətlərdə yeni dövrün başlanğıcı kimi şərh edib. Ekspertlər də görüşdə aktual regional və qlobal məsələlərin müzakirə olunduğunu bildirib. Xüsusən, sammitin hər iki ölkə üçün kritik əhəmiyyət daşıdığı bildirilib. İtaliyanın "Agenzia Italia" adlı xəbər agentliyi Prezident Rəcəb Tayyib Ərdoğan ilə İtaliyanın Baş naziri Meloni arasında görüşü “İtaliya-Türkiyə əlaqələrində yeni səhifə” başlığı ilə açıqlayıb. Nəşr İtaliyanın "Leonardo" şirkəti ilə Türkiyənin "Baykar" şirkəti arasında martın 5-də imzalanan pilotsuz uçuş aparatının inkişafı müqaviləsinə toxunaraq, iki ölkə arasında müdafiə sahəsində əməkdaşlığa diqqət çəkib. Həmçinin xəbərdə Türkiyə ilə İtaliya arasında ticarət həcminin artdığı, həcmin isə 2024-cü ilin sonuna kimi 32,2 milyard dollara çatacağı bildirilib.
Türkiyəli professor, Qafqaz Strateji Araşdırmalar Mərkəzinin sədri Hasan Oktay "Sherg.az"a bildirib ki, Türkiyə Prezidenti R.T.Ərdoğanın Roma Papasının dəfn mərasiminə getməməsi və onun ardınca İtaliyaya səfəri son dərəcə əhəmiyyətlidir. Professorun sözlərinə görə, Ərdoğan İtaliya ilə təkcə müdafiə sənayesində deyil, aviasiya və kosmos kimi yüksək texnologiya sektorlarında da əməkdaşlıq imkanlarını qiymətləndirmək üçün rəsmilərlə görüşüb:
"Qarşılıqlı texnologiya transferi Türkiyənin yerli müdafiə sənayesini gücləndirəcək və İtaliyaya yeni bir perspektiv və enerji verəcək. Həmçinin, ABŞ-nin Avropadakı hərbi məsələlərdən və hərbi investisiyalardan çəkilməsindən sonra Avropa Birliyinin hərbi müdafiə sisteminə ciddi ehtiyacı yaranıb. Bu kontekstdə İtaliya-Türkiyə əlaqələrinin sürətli inkişafı Türkiyənin Avropanın təhlükəsizliyində gücünü göstərməsi baxımından son dərəcə əhəmiyyətlidir. İtaliya, İspaniya və Türkiyə üçlü cənub alyansının Rusiyanın Avropaya təzyiqini azaldacağı görünür. Avropa Birliyinin 1 trilyon dollarlıq müdafiə büdcəsi yaratmaq səyləri və Türkiyənin dövlət və hərbi təcrübəsi Avropanın müdafiəsi üçün son dərəcə əhəmiyyətlidir. Bu kontekstdə Ərdoğanın İtaliyaya səfəri mühüm addımdır".
