Həbsdə olan Pakistanın keçmiş baş naziri İmran Xan "X" hesabında ictimaiyyəti ölkə boyu etiraz hərəkatına hazırlaşmağa çağırıb.
Teleqraf xəbər verir ki, bu barədə Pakistan KİV məlumat yayıb.
“Hamınız hazır olmalısınız, tezliklə ümummilli etiraz hərəkatı başlayacaq”, - mesajda deyilir.
İmran Xan Pakistan hökuməti ilə heç bir sövdələşməyə getməyəcəyini də bildirib.
Yerli KİV yazır ki, Xanın sosial media hesabına birbaşa çıxışı olmasa da, lideri olduğu Pakistan Ədalət Hərəkatı Partiyası onun sosial şəbəkə hesabını kimin idarə etdiyini açıqlamayıb.
Xatırladaq ki, İmran Xan 2018-2022-ci illərdə Pakistan baş naziri olub. 2022-ci il aprelin 10-da parlamentdə etimadsızlıq səsverməsindən sonra vəzifəsindən kənarlaşdırılıb. 2023-cü ildə vəzifə səlahiyyətlərindən sui-istifadə və korrupsiya ittihamları ilə 14 il həbs cəzası alıb.
