"İran Ermənistanın ərazi bütövlüyü və suverenliyinə yönəlmiş istənilən iddianı qətiyyətlə rədd edir". Bunu İranın Ermənistandakı səfiri Mehdi Sübhani deyib. Bundan başqa, Sübhani İslam Əməkdaşlıq Təşkilatının qəbul etdiyi qətnaməyə qarşı çıxıb: "Bir ölkənin digər ölkəyə qarşı ərazi iddialarını əks etdirə biləcək “yalan və saxta ifadələr” bizim üçün qəbuledilməzdir. Bu cür “uydurma və yanlış terminlərin” (İran səfiri qətnaməni bu cür təsvir edib - red.) istifadəsi regionda dinc birgəyaşayışa və mehriban qonşuluğa ziddir. Ona görə də bu tip ifadələrdən çəkinmək lazımdır. “Qərbi Azərbaycan” – İran İslam Respublikasının bir əyalətinin adıdır. Bu adın başqa bir coğrafi bölgəyə, xüsusilə də hər hansı formada ərazi iddialarını ehtiva edəcək şəkildə tətbiqi yolverilməzdir”. Onun sözlərinə görə, İranın Ermənistana münasibətdə mövqeyi dəyişməz olaraq qalır: “İran İslam Respublikası Ermənistanın ərazi bütövlüyünü və milli suverenliyini dəstəkləyir. Biz tövsiyə edirik ki, bu cür özfəaliyyət xarakterli “tarixi iddialar” regionda sülhün bərqərar olmasına mane olmasın”.
Politoloq Məhəmməd Əsədullazadə "Sherg.az"a deyib ki, İranın Ermənistandakı səfiri Mehdi Sübhani birbaşa erməni müxalifətinin dili ilə danışır. Ekspert vurğulayıb ki, onun mövqeyi birbaşa İran Azərbaycan əlaqələrinin normallaşmasını sabotaj edir:
"Mehdi Sübhani İsrail PUA-lanın guya Azərbaycandan İranı vurduğunu qeyd edib. Bununla bağlı rəsmi Bakı İran xarici işlər nazirliyindən izahat tələb etməlidir. Hazırda İran zəifləmiş və "qüruru" sındırılmış öz daxili problemlərinə çəkilmiş dövlətdir. M.Sübhani 12 İyundan sonra, İranın İsrail qarşısında məğlub olduğunu anlamaq istəmir. İranım mühafizəkar sistemi Güney Azərbaycan faktoruna görə Azərbaycan Respublikasını hədəf almaqdan çəkinmir. İranın "Səhər TV" kanalı bu fonda Azərbaycana qarşı informasiya müharibəsi aparır".
Analitik qeyd edib ki, İranın Ermənistandakı səfiri Azərbaycana qarşı düşmən münasibət sərgiləyir:
"Amma, səfiri olduğu ölkənin baş naziri Nikol Paşinyan Azərbaycanla normallaşma prosesinə can atır. Azərbaycan İran tərəfindən bu səfirin geri çağırılmasını tələb etməlidir. İran tərəfi regionda öz siyasətində korrektlər etmək istəyirsə, Sübhanini səfir vəzifəsindən azad etməlidir".
