Azərbaycan Mərkəzi Bankı (AMB) 2025-ci il və 2026-cı ildə illik inflyasiyanın hədəf daxilində olacağını proqnozlaşdırır.
AAMB xəbər verir ki, baza ssenarisi üzrə iyul proqnozlarına görə, illik inflyasiyanın 2025-ci ildə 5.7%, 2026-cı ildə isə 5.3% olacağı gözlənilir.
“Cari ildə inflyasiya proqnozunun davamlı olaraq hədəfdə qalması və valyuta bazarında sabitliyin davam etməsi pul siyasətinin yumşaldılması üçün zəmin yaradır” - məlumatda qeyd edilib.
İqtisadçı Natiq Cəfərli “Sherg.az”a bildirdi ki, Azərbaycan Mərkəzi Bankının inflyasiya proqnozları daha ehtiyatlı və konservativ xarakter daşıyır:
“Bu isə, ölkədə inflyasiyanın hesablanma metodologiyasındakı müəyyən problemlərlə izah oluna bilər. Belə ki, mövcud yanaşmaya əsasən, inflyasiya göstəriciləri hesablanarkən 500-dən artıq mal və xidmətin qiymət dəyişkənliyi nəzərə alınır. Lakin bu məhsulların əksəriyyəti əhalinin gündəlik istehlak səbətinə daxil olmayan, onların real yaşayış xərclərinə əhəmiyyətli təsir göstərməyən məhsullardır. Halbuki, vətəndaşların əsas diqqət yetirdiyi 30-40 adda gündəlik tələbat məhsulları üzrə qiymət artımı daha sürətli və nəzərəçarpacaq dərəcədədir. Bu baxımdan, geniş məhsul spektri əsasında aparılan hesablamalar inflyasiyanın ümumi səviyyəsini süni şəkildə aşağı göstərə bilər. Beləliklə, aktual reallıqları əks etdirən və əhalinin istehlak davranışını daha dəqiq əhatə edən yeni və təkmilləşdirilmiş metodologiyanın tətbiqi zəruridir. Bununla yanaşı, ümumi tendensiyalara nəzər yetirdikdə, son aylarda inflyasiya səviyyəsində müəyyən sabitləşmə müşahidə olunur. Xüsusilə 2020-ci ildən sonra sürətlənmiş qiymət artımları ilə müqayisədə, hazırda daha yüngül dinamikaya rast gəlinir. Lakin bu vəziyyəti tam optimist kontekstdə qiymətləndirmək düzgün olmazdı. Çünki əsas ərzaq məhsulları üzrə inflyasiya səviyyəsinin 2025-ci ilin sonuna qədər 8–9 faiz diapazonunda qalacağı ehtimal edilir”.
