ABŞ qoşunlarının İraqdan çıxarılması Suriyadan ordusunun çıxarılması ilə müşayiət olunacaq. Çünki İraq ərazisindən istifadə etmədən Suriyadakı hərbi kontingenti maddi-texniki baxımından təmin etmək və saxlamaq mümkün olmayacaq.
Bunu Rusiya Prezidentinin Suriya nizamlanması üzrə xüsusi nümayəndəsi Aleksandr Lavrentyev deyib.
Lavrentyev onu da qeyd edib ki, Vaşinqton qoşunlarının İraqdan çıxarılmasını hər cür ləngidəcək:
“Amerikalılar bu məsələnin həllini hər cür gecikdirəcəklər, çünki indi buna hazır deyillər”.
Qeyd edək ki, Pentaqon İraqdan ABŞ ordusunun çıxarılmasının müzakirə edilmədiyini bildirib.
ABŞ ordusunun İraq və Suriyadan çıxması barədə "Sherg.az"a danışan beynəlxalq məsələlər üzrə ekspert Əziz Əlibəyli söyləyib ki, ABŞ bölgədəki iki əsas gücü sıradan çıxardıqdan sonra məqsədlərinə çatdı və öz ordusunun orda qalmasının əhəmiyyəti yoxdur:
"Amma burada 2 vacib məsələ var. Birincisi, ABŞ ordusunun bölgədəki rolu başa çatdı. İkincisi, son zamanlar Amerikanın regiondakı hərbi bazalarına qarşı hücumlar artdı. Bu baxımdan bölgədəki dizaynı dəyişdirərək öz müttəfiqləri üçün əlverişli vəziyyət yaratdıqdan sonra ABŞ-nin burada qalmasına ehtiyac yoxdur. Yaratdığı şərait dedikdə, İraqda və Suriyada kürdlərdən ibarət yarımdövlət qura bilmələri nəzərdə tutulur. Faktiki olaraq tam silahlı, yarımdövlət formasında bir quruluş qurublar"
Ə.Əlibəyli ABŞ-nin İraq və Suriyanı sıradan çıxardığını qeyd edib:
"Sözügedən iki ölkə Fələstin məsələsində İsrailə qarşı üstünlük qura biləcək gücə malik olmadığı üçün, onların əvəzinə ABŞ-nin təsiri ilə bölgədə şiəlik artdı və konkret olaraq Suriyada, İraqda nüfuzu ələ keçirdi. Bu dəyişikliklərdən sonra isə ABŞ-nin bölgədən çıxmasının bir məntiqi var. Bundan sonra bölgədəki dəyişiklər İsrail və kürdlərdən ibarət yarımdövlət olan təşkilatların təsiri ilə baş tutacaq".
