Belqorod vilayətinin rəhbərliyi regionun mərkəzindən atəşlər səbəbindən şəhəri tərk etmək istəyən sakinləri çıxarmağa hazırdır.
“Report” xəbər verir ki, bu barədə vilayətin qubernatoru Vyaçeslav Qladkov teleqramda bildirib
“Sosial şəbəkələrdə bir neçə müraciət görürəm: “Qorxuruq, təhlükəsiz yerə getməyimizə kömək edin”. Əlbəttə, yardım edəcəyik! Artıq bir neçə ailə köçürülüb. Biz özümüzdən asılı olan hər şeyi edirik”, – Qladkov bildirib.
O əlavə edib ki, başçılıq etdiyi regionda müvəqqəti yerləşdirmə məntəqələrində yer sayı yetərli deyil. Bu səbəbdən o, yardım üçün digər regionlardakı həmkarlarına üz tutmalı olacağını açıqlayıb.
Xatırladaq ki, dekabrın 30-da Ukrayna Silahlı Qüvvələri Belqorod şəhərinin mərkəzini atəşə tutub. Nəticədə 24 nəfər ölüb, 100-dən çox insan yaralanıb. Bundan öncə Rusiya hərbçiləri Ukraynanın müxtəlif regionlarına raket və kamikadze dronları vasitəsilə kütləvi hücumlar gerçəkləşdirib.
