Əfqanıstanda internet bərpa olunub.
Bakupost.az xəbər verir ki, bu barədə Tolo News öz Telegram kanalında bildirib.
"Mənbələr ölkədə internetin yenidən işlədiyini bildiriblər", - xəbərdə deyilir.
Qeyd edək ki, sentyabrın 29-da Taliban "əxlaqı qorumaq" adı altında bütün Əfqanıstanda internet xidmətini kəsib.
Sentyabrın 18-də Əfqanıstanın 34 əyalətindən 11-də genişzolaqlı internet bağlanıb. Bu əmri Əfqanıstan lideri Heybətullah Axundzadə “əxlaqsızlığa” qarşı mübarizə çərçivəsində verib. Mənbələr bildiriblər ki, o, yalnız dövlət qurumları və diplomatik nümayəndəlikləri internetə çıxışla təmin etmək üçün yeni şirkətin yaradılmasına göstəriş verib.
Bunun ardınca Əfqanıstanın şimal və qərbində internet kəsilməsi səbəbindən Kabil Hava Limanında xidmətdə fasilələrin yaşandığı bildirilib. Bəlx, Taxar, Baqlan və Bədəxşan əyalətlərindən gələn sərnişinlər internet xidmətinin olmaması səbəbindən biletləri onlayn olaraq təsdiq edə, səyahət təfərrüatlarını turizm agentlikləri ilə razılaşdıra və digər xidmətləri ala bilməyiblər.
Bundan əvvəl Taliban Əfqanıstan universitetlərində qadınların müəllifi olduğu kitabları qadağan etmişdi.
