İsrailə silah dəstəyini davam etdirən Amerika Yaxın Şərqdə atəşkəs danışıqlarını da davam etdirir. ABŞ dövlət katibi Antoni Blinken bu gün ilk səfərini İsrailə edir.
Sherg.az xəbər verir ki, İsrailin Qəzza və Livanı bombalaması fonunda ABŞ dövlət katibi Antoni Blinken girovlarla bağlı razılaşma əldə etmək və döyüşlərə son qoymaq üçün yeni Yaxın Şərq turuna başlayıb.
Blinkenin ilk dayanacağı Tel-Əviv olsa da, onun İsrailin baş naziri Binyamin Netanyahu və prezident Yitzak Hersoqla görüşü gözlənilir.
Blinken danışıqlar zamanı İsrailə son raket hücumundan sonra İrana qarşı cavab tədbirlərinin dozasını azaltmağa ümid edir.
İsrailin “Haaretz” qəzetinə görə, Amerika rəsmiləri Blinkenin dalana dirənmiş girovlarla bağlı danışıqları canlandırmaq şansının az olduğunu düşünür.
Blinken, HƏMAS-ın "Əqsa tufanı" əməliyyatından sonra İsrailin Qəzzaya hücumlarının başladığı 7 oktyabrdan bəri bölgəyə 11-ci səfərini edir.
ABŞ bölgədə atəşkəs üçün vaxtaşırı bəyanatlar verir, görüşlər təşkil edir, lakin İsrailə hərbi yardımı kəsməyi planlaşdırmır.
ABŞ prezidenti Co Bayden administrasiyasının yüksək səviyyəli rəsmilərinin oktyabrın 13-də İsrailin müdafiə naziri Yoav Gallanta göndərdiyi məktub mətbuata sızıb. Məktubda xəbərdarlıq edilib ki, İsrail 30 gün ərzində Qəzzadakı humanitar böhranın həlli istiqamətində mühüm addımlar atmasa, Vaşinqtonun İsrailə silah tədarükünün risk altında olacaq.
Bunun ardınca İsrail ordusu humanitar yardım daşıyan 50 yük maşınının Qəzza zolağının şimalına köçürüldüyünü açıqlayıb.
Bununla belə, ABŞ-ın “Politico” xəbər saytının məlumatına görə, Bayden administrasiyası Qəzzaya yardıma tətbiq etdiyi məhdudiyyətlər barədə İsrailə xəbərdarlıq etsə də, ABŞ İsrailə silah embarqosu tətbiq etməyi düşünmür.
"Politico"-ya danışan anonim mənbələr Baydenin Yaxın Şərq humanitar məsələləri üzrə xüsusi nümayəndəsi Lise Qrandenin avqust ayında Vaşinqtonda humanitar yardım qrupları ilə görüşdüyünü bildirib.
Həmin görüşdə Qrande deyib ki, İsrail Vaşinqtonun yardımdan imtina etməyəcəyi “çox az müttəfiqlərdən ibarət dar bir dairənin” bir hissəsidir.
