İran Prezidenti Məsud Pezeşkian strateji məsələlər üzrə vitse-prezident Məhəmməd Cavad Zərifin istefasını qəbul etməyib.
APA xəbər verir k, bu barədə Hökumət sözçüsü Fatimə Mohacerani bildirib.
“Cənab Zərif istefa ərizəsini prezidentə təqdim edib, lakin bu hələ Prezident Məsud Pezeşkian tərəfindən qəbul edilməyib”, - Hökumət sözçüsü qeyd edib.
Qeyd edək ki, İranın strateji məsələlər üzrə vitse-prezidenti Məhəmməd Cavad Zərif ötən axşam vəzifəsindən istefa verib.
O İslam Respublikasının məhkəmə sisteminin rəhbəri Qulamhüseyn Möhseni-Ejei ilə görüşdən sonra istefa vermək qərarına gəldiyini bildirib: "Dünən ədliyyə orqanının rəhbəri məni görüşə dəvət etdi. O, ölkədəki mövcud vəziyyəti vurğulayaraq hökumətə daha çox təzyiq göstərməmək üçün mənə universitetə qayıtmağı tövsiyə etdi".
Zərif son 6 ayda təhqir, böhtan və təhdidlərlə üzləşdiyini, lakin ölkəsinə xidmət etməkdə israrlı olduğunu bildirib.
Bu İranın hazırkı hökumətinin formalaşmasından sonra ikinci dəfədir ki, Cavad Zərif tutduğu vəzifədən istefa verməyə cəhd edir. O, vəzifədən cəmi on gün keçdikdən sonra istefa ərizəsini ilk olaraq avqustun 11-də prezidentə təqdim edib. O vaxt prezident onun ərizəsini qəbul etməyib.
