Polşa hökuməti Britaniyanın “BAE Systems” şirkətinin texnologiya və bilik transferi ilə 155 mm-lik artilleriya mərmiləri istehsal edəcək zavodun yaradılmasını təsdiqləyib.
Trend-in “Telegraph”a istinadən verdiyi məlumata görə, BAE əsas texnologiyaları və istehsal təcrübəsini Polşanın dövlət silah konserni PGZ-yə verəcək. Yeni müəssisənin istehsal gücünün ildə təxminən 180 min mərmi olması gözlənilir.
Polşanın Baş naziri Donald Tusk bildirib ki, layihə ölkənin müdafiə potensialını və NATO-nun şərq cinahındakı qüvvələrini əhəmiyyətli dərəcədə gücləndirəcək. Yeni zavodda istehsal prosesində BAE-nin Uelsdəki partlayıcı maddələr zavodunda tətbiq olunan avtomatlaşdırma üsulları tətbiq olunacaq.
Məsələ regionda təhlükəsizlik gərginliyinin artdığı bir vaxta təsadüf edir — bu addım, çərşənbə günü Polşa hava məkanında Rusiya dronlarının vurulmasından sonra NATO-nun regiona əlavə qoşun və silah yerləşdirməsinin fonunda atılır.
